Debati për çështjen
iraniane do të vijojë sot në selinë e OKB-së në Nju Jork. Mbledhja e djeshme në Paris
e pesë anëtarëve të përhershëm të OKB-së, përfshi edhe Gjermaninë, nuk doli me një
deklaratë konkrete. Mbetet për t’u shënuar qëndrimi i Rusisë dhe i Kinës, vende të
cilat nuk pranojnë kurrsesi sanksionet ndaj republikës islamike.
Situata
në Iran si edhe vendimi i presidentit bolivian Morales për kombëtarizimin e hidrokarbureve
bëri që çmimi i naftës në botë të rritet sërish. Dje në Londër çmimi për fuçi arriti
në 74,97 dollarë, ndërsa në Nju Jork 74,70 dollarë.
Edhe sot në Irak, pikërisht
në ditën kur u mblodh për herë të parë parlamenti i ri, pati 18 viktima, si pasojë
e një atentati me kamikaze në një qendër rekrutimi në Faluzhë. Po ashtu në Bagdad,
disa terroristë zbritën me forcë nga autobusi katër studentë dhe më pas i ekzekutuan.
Bashkimi
Evropian i pezulloi bisedimet për hyrjen e Serbisë në Evropë për arsye se Beogradi
nuk e ka mbajtur premtimin për dorëzimin e komandantit të ushtrisë serbe të Bosnjës
Ratko Mladiq Gjykatës Ndërkombëtare të Hagës, në Hollandë.
Komisioni i
ligjeve i parlamentit shqiptar miratoi disa ndryshime në projektligjin e konfliktit
të interesave. Sipas këtyre ndryshimeve deputetit nuk do t’i lejohet më të ushtrojë
detyrën e avokatit apo ekspertit të licensuar dhe këshilltarit ligjor, sepse këto
janë në kundërshtim me Kushtetutën e Republikës së Shqipërisë.
Pas vendimit
të Grupit negociator të Kosovës për krijimin e dy njësive komunale në Mitrovicë, njëra
serbe dhe tjetra shqiptare, me qindra studentë dhe punëtorë morën pjesë sot në një
manifestim proteste në Prishtinë, duke brohoritur “Jo nuk ndahet Mitrovica”. Bisedimet
ndërmjet shqiptarëve dhe serbëve për statusin e Kosovës do të rifillojnë nesër në
Vjenë.