Kisha e Milanos dhe e Ramapuranit në Indi festojnë tre të Lum të rinj
( 30. 04. 06 R. V. )Sot - në dy kremtime solemne, ndër dy vende shumë larg nga njëri-tjetri:
në Sheshin e Duomos të Milanos në Itali dhe në Ramapuram të Indisë, u ngritën në nderimet
e elterit tre të lum të rinj. Janë meshtarët dioqezanë italianë, don Luigji Biragi,
themelues i “Motrave Marçeline”, dhe Don Luigji Monza, themelues i “Institutit Shekullar
të Motrave Apostulle të Dashurisë”, si dhe meshtari dioqezan indian, don Agostin Thevarparampil. Për
të dy lumnimet u kremtuan dy liturgji solemne, shoqëruar me ritin e beatifikimit.
Liturgjinë soleme të kremtuar në Milano e kryesoi kryeipeshkvi, kardinali Dionigi
Tetamanzi, në praninë e Legatit papnor, kardinalit Hosè Saraiva Martins, prefekt
i Kongregatës për Çështjet e Shenjtorëve. Liturgjinë solemne në Ramapuram, në dioqezën
e Palai, e kryesoi ipeshkvi vendas, imzot Jozef Kallarangat. Të dy kremtimet
janë shprehje konkrete e dëshirës së Papës Benedikti XVI për t’i aktivizuar në mënyrë
të dukshme kishat e veçanta në ritet e shpalljes të të lumëve të rinj. Këtë dëshirë,
të shprehur që në fillim të Papnisë, Ati i Shenjtë e theksoi të enjten e kaluar në
një mesazh drejtuar dikasterit për Çështjet e Shenjtorëve, përmes të cilit ripohon
se pikat themelore për zbatimin korrekt të procedurave të lumnimeve dhe të shenjtërimeve,
janë “Siguria për famën e shenjtërisë, prania e një mrekullie ‘fizike’ ose e një situate
reale martirizimi”. Në lumnimet e sotme u provua plotësisht pika e parë, që flet
për famë të padiskutueshme të shenjtërisë të tre të Lumëve të rinj, të cilët iu shtuan
sot Kishës katolike në dy kontinente. Për këtë flet mesazhi që i sjellin besimtarëve
të sotëm. Po e kujtojmë përmbledhtas, duke nisur nga mesazhi i të Lumit Luigji Biragi,
për të cilin na flet postulatori i çështjes së lumnimit, avokati Andrea Ambrozi: -
“I përvujtë, modest i peshuar e i urtë, ai e bekoi dhe deshi Kishën, shoqërinë, atdheun,
familjen. Ungjillor në kuptimin e plotë të kësaj fjale, ndjeu dashuri atërore për
të gjithë njerëzit, pa bërë kurrfarë dallimi ndërmjet të varfërve e të pasurve, të
diturve e të paditurve. Për ta, si bij të një Ati të vetëm, u lut e shkriu gjithë
jetën. Të njihemi me mesazhin e don Luigi Monxës për të cilin
na flet postulatori i Çështjes së Lumnimit, Atë Luigji Mexadri: - Mesazhi i
të Lumit përmblidhet në dy fjalë: kalbja është veprimi i farës që vdes për të dhënë
fryt. Është dhurata shëlbuese e Pashkëve. Dashuria është forca e Zotit, për të depërtuar
në një botë pagane. Prandaj ai u përpoq të ndizte shkëndija të shumta në këtë botë,
për ta rinuar nga brënda. Së fundi, nga India, na flet zevendës-postulatori
i çështjes së lumnimit, atë Gjani Kalifanos: - I lumi Agostin Thevarparampil
jo vetëm që ia kushtoi gjithë jetën shërbimit të të varfërve, por edhe jetoi si ata.
Ai i la trashigim Kishës dhe popullit indian dashurinë e njeriut që bëhet gjithçka
për të gjithë.