“Mungesa e dashurisë është shkaku i parë i zgjidhjes së martesave dhe pakësimit të
lindjeve”- thekson Papa në mesazhin drejtuar Akademisë Papnore për Shkencat Shoqërore
( 28. 04. 06 R. V. ) “Mungesa e
dashurisë është shkaku i parë i zgjidhjes së martesave dhe pakësimit të lindjeve në
vendet e industrializuara”: këtë theksoi Papa Benedikti XVI në mesazhin drejtuar Akademisë
Papnore për Shkencat Shoqërore, mbledhur që sot në Vatikan në asamblenë e 12-të
plenare. E fëmijët janë shpesh të parët që vuajnë pasojat e zhdukjes së dashurisë
e të shpresës – vijon të nënvzojë Ati i Shenjtë, i cili më pas vë theksin mbi problemet
më të mprehta që trondisin sot fëmijët dhe mbi shkakun e djepave të zbrazët. Dokumenti
i Papës i drejtohet profesoreshës Meri Ejn Glendon, kryetare e Akademisë Papnore,
me rastin e asamblesë së 12-të plenare me temë ‘Rini që zhduket? Solidaritet me të
rinjtë dhe fëmijët në një epokë të trazuar’, që filloi sot punimet, për të përfunduar
më 2 majin e ardhshëm në Vatikan. Në një moshë delikate – denoncon Papa – më të
vegjëlve shpesh u mungon udhëheqja morale nga ana e botës të të rriturve, gjë që dëmton
rëndë zhvillimin e tyre intelektual e shpirtëror. Shumë fëmijë – vëren Ati i Shenjtë
– rriten në një shoqëri që e ka harruar Zotin dhe dinjitetin e pacënueshëm të çdo
njeriu. E jo vetëm kaq. Papa pohon se përballë proceseve të globalizimit, fëmijët
gjithnjë më shpesh rrezikohen nga një vizion thjeshtë materialistik i universit e
i jetës. Por mosha e njomë – vijon Papa – për vetë natyrën e vet, priret nga e mbinatyrshmja.
Fëmijët, mbi të gjitha, duhen dashur – bën thirrje Ati i Shenjtë – në mënyrë që ta
kuptojnë se nuk janë mbi tokë rastësisht, por për hir të një dhurate që është pjesë
e planit të dashurisë së Hyjit. Prandaj prindërit dhe edukatorët janë të thirrur të
zgjedhin një projekt jete që është në gjendje ta dallojë të vërtetën nga gënjeshtra,
të mirën nga e keqja, të drejtën nga e padrejta. Në mesazhin e Papës theksohet
edhe plakja e popullsisë në shoqëritë e vendeve të industrializuara, fenomen ky,
që shoqërohet me mungesën e numrit të nevojshëm të të rinjve që përtërijnë popullsinë.
Benedikti XVI e di se në bazë të këtij problemi janë disa shkaqe të ndërlikuara, por
– nënvizon - në fund të fundit duhet të pranojmë se shkaqet kryesore janë të natyrës
morale e shpirtërore. E një gjendje e tillë lidhet me defiçitin e fesë, të shpresës
e të dashurisë. Prandaj, duke rikujtuar Enciklikën e tij të parë ‘Zoti është dashuri’,
Papa pohon se dashuria, për natyrën e vet, drejtohet nga amshimi. Ndoshta – lexojmë
në mesazh - pikërisht mungesa e kësaj përmase krijuese të dashurisë, na shpjegon shkakun
pse shumë çifte bashkëjetojnë, pa u martuar, pse shumë martesa dështojnë e pse përqindja
e lindjeve ka rënë në mënyrë të ndjeshme. Papa i nxit anëtarët e Akademisë Papnore
të Shkencave Shoqërore ta ndihmojnë Kishën në misionin e saj për të dhënë dëshmi të
humanizmit të vërtetë, të ndriçuar nga Ungjilli. Duke folur për temën e lirisë
njerëzore, Shenjtëria e Tij vëren se kur kjo vihet në rrezik, të rinjtë e ndjejnë
fuqimisht mungesën e saj dhe bëhen të paaftë për t’u impenjuar në realizmin e idealeve
që i japin formë jetës së tyre si individë e si anëtarë të shoqërisë. Liria shpirtërore
– vijon Shenjtëria e Tij – është kusht për rritjen e vërtetë njerëzore. Ata që besojnë
se Ungjilli ndriçon çdo aspekt të jetës -përfundon Benedikti XVI – nuk duhet të harrojnë
kurrë kundërvënien themelore ndërmjet së mirës e së keqes. Feja, që jetohet me dashuri
dhe u transmetohet breznive të reja – pohon Papa – është element thelbësor për ndërtimin
e një ardhmërie më të mirë, që mbron solidaritetin ndërmjet breznive. Në asamble,
mbledhur në Vilën e Piut IV, marrin pjesë akademikë papnorë, specialistë dhe vëzhgues
të rinj nga vende të ndryshme të botës. Me bilançin e parë të takimit, organizuar
nga profesor Pierpaolo Donati i Universitetit të Bolonjës, do të njihemi të martën
e ardhshme përmes një konference në Sallën e Shtypit ‘Gjon Pali II’ të Selisë së
Shenjtë.