Vëmendja e Papës për Afrikën: koment i kryeipeshkvit ganez Palmer-Bukle
( 28. 04. 06 R. V. )‘Kontinenti afrikan është shpresa e madhe e Kishës’ këtë
theksoi Papa muajin e kaluar në takimin me klerin romak në Vatikan. Në këtë vit
të parë të Papnisë, Benedikti XVI i ka kushtuar një vëmendje të dorës së parë Afrikës,
pasurive të saj e emergjencave të saj. Gjatë 12 muajve ka takuar ipeshkvijtë e 19
vendeve afrikane, ardhur në Romë për vizitë ‘ad Limina’. I ka kërkuar ndihmë bashkësisë
ndërkombëtare për nevojat e kontinentit, por ka denocuar edhe shpërdorimet koloniale,
që vijojnë në këto toka kaq të pasura si dhe interesat e fuqive të mëdha, që fshihen
shpesh herë pas konflikteve afrikane. Për impenjimin e Benediktit XVI në favor të
Afrikës, i kërkuam një koment të shkurtër kryeipeshkvit të Akrës, Imzot Çarlz Palmer
Bukle, që sapo përfundoi vizitën ‘ad Limina’ me ipeshkvijtë e Ganës: “Është
një detyrim shumë i fortë, që peshon mbi Kishën në Evropë e Kishën në Amerikë,
lidhur me dëgjimin e zërit të Kishës afrikane për këto padrejtësi, për këto luftëra,
të shkaktuara nga interesa gjeo-politike, që s’kanë të bëjnë me Afrikën, sepse armët
sigurisht nuk i fabrikojmë ne; tregtia e diamantëve, e arit e pasurive të tjera të
vendit tonë, nuk bëhet në Afrikë, por këtu, në Evropë. Atëherë, në se Evropa do të
ishte më e drejtë ndaj nesh në marrëdhëniet tregtare e në marrëdhëniet politike në
nivel të drejtësisë ndërkomnbëtare, besoj se Afrika do të ketë vërtetë rastin dhe
aftësinë për t’i zgjidhur edhe padrejtësitë e vogla brënda vetë Kontinentit.