Рэстаўрацыя фрэсак славутага рымскага касцёла "Aracoeli".
Афiцыйная ватыканская газета “Osservatore romano” паведамляе аб выхадзе ў свет кнiгi
спадара Томмазо Стрынатi “Aracoeli”. Зноў адкрытыя фрэскi”. У кнiзе паведамляецца
аб нядоўняй знаходке фрэсак ХIII стагоддзя ў знакамiтай рымскай базылiцы “Святая Марыя
ў Аracoeli”, якая знаходзiцца на левым баку Капiталiйскага ўзгорка. Згаданыя фрэскi
былi знойдзеныя пяць гадоў таму ў каплiцы св. Паскаля Байлона, у глыбiнi правага нефа
базылiкi. Працы па iх аднаўленню i рэстаўрацыi завершылiся два гады таму. На шчасце,
фрэскi нядрэнна захавалiся, таму адразу ж магчыма было высвятлiць, што размова iдзе
аб некаторых эпiзодах з жыцця св.Яна Багаслова i св.Яна Хрысцiцеля, а таксама аб выяве
Панны Марыi з Немаўляткам Езусам, якая знаходзiцца над алтаром i да гэтай пары схаваная
пад працай гiшпанскага мастака ХVII стагоддзя Вiнцэнта Вiтторiо, на якой выяўлены
св.Паскаль перад эўхарыстычным келiхам. Аўтар кнiгi прапануе iканаграфiчнае тлумачэнне
шэрагу фрагментаў, намаляваных у ХIII стагоддзi, а таксама прапануе чытачам паглыблены
аналiз узаемаадносiнаў памiж Рымам, Ассiзi i Фларэнцыяй у той перыяд, калi ў мастацтве
Iталii дамiнавалi такiя славутыя мастакi, як Джотто i Пьетро Каваллiнi. Да пасьвячання
ў гонар св.Паскаля, каплiца, на думку аўтара, на прыканцы ХIII стагоддзя належала
да адной з магнацкiх радзiнаў Рыму. У Вечным горадзе гэта самы старажытны з вядомых
на сёняшнi дзень прыкладаў пахавальнай каплiцы ўпрыгожанай цыклам фрэсак. На адной
з iх – Езус пасярод двух Анёлаў i двух святых (адзiн з якiх, хутчэй за ўсё, св.Пётр),
выяўлена “Узнясенне св.Яна Багаслова”, намаляванае на аснове аповяда Якава Варагiнскага
ў “Залатой лягендзе”. У каплiцы св.Паскаля былi знойдзены i фрагменты сынопiй
– падрыхтоўчых малюнкаў – на якiх даволi добра бачныя тры асобы. Магчыма, гэта ўкленчаны
Ян Хрысцiцель i бласлаўляючы Хрыстус. Трэццi вобраз, хутчэй за ўсё, не быў скончаны
мастаком. Аўтар кнiгi мяркуе, што каплiца належала славутай рымскай радзiне Колонна,
бо адзiн з iх, Джованнi Колонна, меў iмёны двух святых Янаў. Аб гэтым ускосна сведчыць
i тое, што ў пэўны момант фiгуры святых Янаў былi пакрытыя вапнай, у той жа час выява
Мацi Божай з Немаўляткам Езусам на некаторы час захавалася. Магчыма гэта тлумачыцца
тым, што радзiна Колонна трапiла ў нямiласць. У кожным выпадку, эпоха, аб якой
iдзе гаворка, параўнальна мала вядомая, таму меркаваннi застаюцца толькi меркаваннямi,
адкрываючы навукоўцам шляхi да новых даследванняў.