13-vjetori i vizitës së Papës Gjon Pali II në Shqipëri. Në përkujtim të asaj vizite
Ministri i Jashtëm i Vatikanit, Imzot Gjovani Lajolo vizitoi Vendin e Shqipeve
Përfundoi sot vizita disaditore e Ministrit të Jashtëm të Vatikanit Imzot Gjovani
Lajolos në Shqipëri. Është domethënëse dhe ndoshta jo krejt e rastësishme, se kjo
përkoi me 13-vjetorin e vizitës historike të Gjon Palit të II. Këtu duhet vënë në
dukje se ka një ndryshim të madh mes kushteve të atëhershme fetare, shoqërore dhe
politike në të cilat u zhvillua vizita a Papës Wojtila dhe situatës së sotme në vend.
Kisha shqiptare në 1993 nuk kishte ende ipeshkvijtë e saj ndërsa sot përparimet janë
të dukshme, edhe pse ungjillizimi lë ende për të dëshiruar. Ishte Papa Gjon Pali
II ai që në praninë e së Lumes Nënë Terezë vendosi gurët e parë të Kishës Katolike
Shqiptare me shugurimin e ipeshkvijve të rinj Imzot Frano Illisë, Imzot Zef Simonit,
Imzot Robert Ashtës o.f.m. dhe Imzot Rrok Mirditës. Vizita e Imzot Lajolos ishte,
në një farë kuptimi, korrja e fryteve të ringjalljes së Kishës Shqiptare. Për të nënvizuar
këtë ringjallje, Ministri i Jashtëm i Vatikanit, sikurse edhe Gjon Pali i II, u ndal
te Shenjtnorja e Zojës së Këshillit të Mirë, asokohe gërmadhë, së cilës ipeshkvijtë
shqiptarë ndër shekuj i patën besuar fatin e Kishës dhe të popullit tonë. Kjo
ripërtëritje e Kishës në Shqipëri vjen pas një periudhe të gjatë persekutimi e martirizimi,
të cilën Selia e Shenjtë e vlerëson lart si shfaqje të besnikërisë së klerit katolik
shqiptar ndaj Ungjillit të Krishtit dhe Katedrës së Shën Pjetrit. E këtë mirënjohje
Imzot Lajolo e shprehu edhe duke thënë uratë te varret ku pushojnë tashmë disa prej
prelatëve të Kishës sonë e në mënyrë të veçantë te varri i Kardinal Koliqit. Por
mirënjohja ndaj klerit katolik dhe kontributit të tij në bashkëjetesën civile në Shqipëri
u shpreh edhe nga ana e autoriteteve shtetërore. Kështu Presidenti i Republikës, z.Alfred
Moisiu, i dha Imzot Rrok Mirditës urdhërin Nënë Tereza, pikërisht të asaj Nënë Tereze
që me praninë e saj të përvuajtur në shugurimin e ipeshkvijve të parë të demokracisë,
i dha ngjyra kombëtare lulëzimit të fesë në Shqipëri. Para 13-vjetësh Ati i Shenjtë
u thoshte shqiptarëve në Sheshin Skënderbej se nuk do të ishin të vetëm. Sot, Imzot
Lajolo, në vizitën që i bëri kreytares së parlamentit shqiptar z. Jozefina Topalli,
përsëriti se Selia e Shenjtë do të mbështesë fuqimisht Shqipërinë për hyrjen në Evropë,
duke vënë edhe një herë në pah, përkatësinë historike të vendit të Gjergj Kastriotit.