Выйшла ў свет кніга беларускага святара П. Янкоўскага.
У беларускай сталіцы ўбачыла свет кніга “Записки сельского священника”, аўтарам якой
з’яўляецца Плакід Янкоўскі (гады жыцця: 1810–1872). Гэта першае выданне аўтара, дзе
пад адну вокладку сабраны нарысы і ўспаміны на рускай і польскай мовах. Плакід Янкоўскі
быў святаром. Скончыў Віленскі універсітэт. Жыў у Жыровічах, што пад Слонімам, выкладаў
у мясцовай праваслаўнай семінарыі. У XIX стагоддзі ён выдаў некалькі кніг даволі разнастайнай
прозы, багатай эстэтычнымі адценнямі гумару і вельмі супярэчлівай. У кнізе “Записки
сельского священника” сённяшнія чытачы ўпершыню пазнаёмяцца з нарысамі пра Сынковіцкую
царкву, Віленскую Мікалаеўскую царкву, пра забабоны і прымхі, а таксама з іншымі артыкуламі. У
раздзеле ўспамінаў Плакід Янкоўскі згадвае протаіерэяў Пракопія Сіткевіча, Іпаліта
Гамаліцкага, Міхаіла Баброўскага, Антонія Тупальскага. Цікавай у кнізе з’яўляецца
бібліяграфія. У ёй складальнікі кнігі сабралі амаль усе публікацыі Янкоўскага, найперш
тыя, якія з’яўляліся ў “Літоўскіх Епархіяльных ведамасцях” і ў “Віленскім весніку”,
а таксама творы Янкоўскага на польскай мове і артыкулы пра яго асабіста.