Сёньня Вялікі ( ці як у нас гаворыцца Страсны) Чацьвер. На знак лучнасьці паміж Пастырам
Унівэрсальнае Царквы і ягонымі сабратамі, якія вядуць душпастырскую працу ў розных
дыяцэзыях сьвету, сёньня ў галоўнай Базыліцы Сьвятога Пятра ў Рыме, раніцаю, прайшла
спэцыяльная Сьвятая Імша “Крыжмы”- на знак адзінства Папы са сваімі сьвятармі. Папа
Бэнэдыкт 16 саслужыў яе разам з кардыналамі, біскупамі і сьвятарамі прысутнымі ў гэты
час у Рыме. У гэтым годзе Папа не зьвярнуўся да сьвятароў з пасланьнем на Вялікі
Чацьвер. Гэтым Бэнэдыкт 16 спыніў традыцыю свайго папярэдніка Папы Яна Паўла ІІ. У
1979-м годзе Папа Вайтыла пачаў пісаць пасланьні на Вялікі Чацьвер у знак свайго асаблівага
клопату аб сьвятарстве і аб праблемах сьвятарскага служэньня. У гады пантыфікату
Яна Паўла ІІ пасланьні тычыліся такіх тэмаў, як сьвятарскія пакліканьні, маральны
стан духоўных асобаў, духоўнасьць і цэлібат. Апошняе пасланьне Яна Паўла ІІ да сьвятароў
было прысьвечана важнасьці Эўхарыстыі. Папа-нябожчык падпісаў яго за тры тыдні да
сваёй сьмерці. У сваім казаньні, пад-час адпраўленьня Эўхарыстыі, сёньня ў чацьвер
раніцай 13-га красавіка, Папа Бэнэдыкт 16 ў прыватнасьці сказаў:
Сьвяты Чацьвер
ёсьць днём, у які Госпад дае сваім Дванаццацём вучням заданьне сьвятарскага служэньня,
цераз хлеб і віно, Сакраманту свайго Цела і Крыві аж да моманту свайго павароту.
Такім чынам месца пасхальнага ягняці ды ўсіх іншых ахвяраваньняў Старога Запавету
заступае ахвяраваньне Хрыстовага Цела ды Ягонае Крыві, ахвяраваньне сябе самога.
Такім чынам- сказаў далей Сьвяцейшы Айцец зьвяртаючыся да прысутных сьвятароў—новы
культ абапіраецца на факце, што перад усім, Бог дае нам дар, ды мы стаем ягонымі:
стварэньне вяртаецца да Стварыцеля. Такім чынам таксама сьвятарства стаецца новаю
справаю, не ёсьць больш справаю нашчадкаў, але знаходзіцца ў таямніцы Ісуса Хрыста.
Ён ёсьць заўсёды Тым які ахвяроўваецца і нас прыцягае да сябе. Толькі Ён можа сказаць:
“Гэта Цела Маё—гэта Кроў Мая”. Таямніца сьвятарства ў Касьцёле- сказаў далей Папа—заключаецца
ў факце, што мы сьвятары гаворым у імені Хрыста. Ісус жадае выконваць сваё сьвятартсва
цераз нас сьвятароў. Быць сьвятаром- сказаў на заканчэньне Папа Бэнэдыкт 16—значыць
быць прыяцелям Ісуса Хрыста. Сьвет патрабуе Бога—не будзь якога бога, але Госпада
Ісуса Хрыста, Бога які стаўся целам і крывёю, Які нас палюбіў аж да сьмерці за нас,
Які ўваскрос. Гэты Бог мусіць жыць сярод нас і мы ў Ім.
У гэты момант,
калі ідзе ў эфір нашая праграма, Папа Бэнэдыкт 16 адпраўляе Імшу Гасподняе Вячэры
ў Базыліцы Сьвятога Яна на Латэране. Сьвяцейшы Айцец абмыў ужо ногі 12 канонікам
гэтае Базылікі. Гэтым актам кожны сьвятар уключаецца ў пасланніцтва, якога запатрабаваў
Хрыстос—менавіта быць слугою для сваіх братоў: бы Сын Чалавечы прыйшоў не каб Яму
служылі, але каб паслужыць і аддаць сваю душу на выкупленьне многіх. Але аб гэтых
і іншых падзеях Вялікага Тыдня мы будзем больш гаварыць у нашай заўтрашняй праграме.