Takimi V botëror i familjeve me Papën në Spanjë nga 1 deri më 9 korrikun e ardhshëm,
rast i përshtatshëm për të zbuluar bukurinë e martesës
( 04. 04. 06 R. V. )“Transmetimi i fesë në familje”: kjo është tema e zgjedhur
për takimin Botëror të familjeve me Papën. Takimi do të mbahet në Valencia të Spanjës
nga 1 deri më 9 korrikun e ardhshëm. “Është rast i përshtatshëm për të zbuluar
e për të shpallur përsëri bukurinë e thirrjes, që të nxit të martohesh e të krijosh
familje, në këtë çast të historisë, përplot me pyetje të vështira e shpresa të mëdha”-
kështu ipeshkvijtë spanjollë, në përfundim të Asamblesë së tyre plenare mbajtur në
Madrid, vënë në dukje, në një Mesazh, zemrën e kësaj ngjarjeje, që do të mbledhë në
Valencia, sipas parashikimeve, një milion e gjysëm përfaqësues të familjeve nga mbarë
bota e, sigurisht edhe nga Shqipëria e trevat shqiptare, e cila që nga viti 1994 merr
pjesë rregullisht në të gjitha takimet e kësaj natyre. Kulmi i kremtimeve do të arrijë
në takimin me Benediktin XVI, që do të jetë në qytetin spanjoll më 8 e më 9 korrik,
për të kumtuar Ungjillin e familjes, vlera e së cilës – siç shkruajnë ipeshkvijtë
– është qendrore për shoqërinë e për Kishën. Dy janë çastet kryesore të takimit:
ai i së shtunës, me arritjen e Papës, dhe i së dielës, me kremtimin e Meshës Shenjte.
Qëllimi kryesor i Takimit V Botëror të familjeve – kujtojmë se takimi i parë u thirr
në vitin 1994 nga Gjon Pali II - është të ndihmojë për forcimin e identitetit të
familjes të bazuar mbi martesën, si vend ku njerëzit marrin dhantinë e jetës dhe nxitjet
e duhura për ta jetuar atë me dinjitet. Por në se Ungjilli i jetës ka qenë gjithnjë
i rëndësishëm – vëren episkopati spanjoll - sot është posaçërisht urgjent. Populli
ynë – shkruajnë ipeshkvijtë – e vlerëson shumë familjen. Të rinjtë dëshirojnë të formojnë
familje të lumtura, pavarësisht nga vështirësitë, që nuk mungojnë kurrë. Ne besojmë
– vijon mesazhi i prelatëve – se të jesh dhëndërr e nuse, burrë e grua, baba e nënë,
duhet të jetë diçka e domosdoshme për të pritur fëmijët e për t’u kujdesur për shëndetin
e tyre fizik e shpirtëror, mjedis i ekologjisë njerëzore, shenjtërore e jetës dhe
e shpresës së shoqërisë.