Paqja nuk është kurrë e pamundur: kështu u tha Papa ipeshkvijve të Bregut të Fildishtë
(03. 04. 06 R. V.)Kriza e rëndë e pazgjidhur politike në Bregun e Fildishtë – ishte
në qëndër të fjalimit që Papa Benedikti XVI u drejtoi sot paradite ipeshkvijve të
vendit afrikan , duke i pritur në audiencë, në përfundim të vizitës së tyre ‘ad Limina’
– tek ‘Varret e Apostujve’. E kjo krizë, që hap një plagë të thellë në marrëdhëniet
ndërmjet shtresave të ndryshme të shoqërisë së vendit, ushqehet nga një konflikt civil
ndërmjet Qëndrës Veriore të Bregut të Fildishtë, pushtuar që nga viti 2002 prej rebelëve
të forcave të reja dhe Jugut, nën drejtimin e presidentit Gbagbo. Ndonëse në vitin
2003 u formua qeveria e pajtimit kombëtar, vendi mbetet i ndarë në dy pjesë, ku nuk
pushojnë ndeshjet, të cilat krijojnë rrezikun e shpërthimit të luftës civile. Në këto
rrethana, që kanë hapur plagë të cilat nuk mund të shërohen lehtë – vërejti Papa -
paqja mund të rivendoset vetëm përmes faljes të dhuruar bujarisht e pajtimit të realizuar
konkretisht. Prandaj Benedikti XVI i ftoi palët në konflikt të vijojnë me guxim dialogun
për të shqyrtuar në mënyrë të thelluar e të drejtë shkaqet që kanë çuar në situatën
aktuale: ‘Le chemin de la paix… Rruga e paqes është e gjatë
dhe e vështirë, por nuk është kurrë e pamundur” – këtë theksoi Papa dhe i nxiti
katolikët të japin shembull të mirë ndër bashkësitë e tyre, duke rikrijuar besimin
ndërmjet nxënësve të Krishtit, pavarësisht nga opinionet e ndryshme politike që mund
të kenë. Në kishat tuaja dioqezane – i porositi Papa ipeshkvijtë – prelatët, meshtarët
e rregulltarët duhet të jenë modele të vëllazërimit e të dashurisë, duke kontribuar
me fjalët e tyre, e sidomos me veprat, në ndërtimin e një shoqërie të pajtuar”.