Besimtarët përgatiten të kremtojnë kryevjetorin e vdekjes së Papës Vojtila. Të dielën,
nata e lutjes në Sheshin e Shën Pjetrit me Benediktin XVI
(31. 03. 06 R. V.)Populli i Zotit,
plot emocion e mirënjohje, përgatitet të përkujtojë kryevjetorin e vdekjes së Gjon
Palit II; të dielën e ardhshme në Sheshin e Shën Pjetrit do të mbahet nata e lutjes
në praninë e Benediktit XVI. Besimtarët e mbarë botës përgatiten të kujtojnë
përvjetorin e parë të vdekjes së Gjon Palit II. Çasti kulmor i të gjitha kremtimeve
do të jetë nata e lutjes, organizuar nga dioqeza e Romës, në Sheshin e Shën Pjetrit,
mbrëmjen e së dielës, 2 prill. Rruzares Shenjte do t’i prijë kardinali Ruini. Mbrëmja
e lutjes do të fillojë në orën 20. 30 me leximin e disa shkrimeve të Karol Vojtilës.
Në orën 21 Benedikti XVI do të dalë në dritaren e studios së tij për të bashkuar zërin
me turmën e besimtarëve në vijim të Rruzares Shenjte. Më pas, në orën 21. 37, pikërisht
në atë orë kur një vit më parë ndërronte jetë Gjon Pali II, Benedikti XVI do t’u drejtojë
fjalën të pranishmëve dhe do të japë Bekimin e tij apostolik. E në sa vijojnë të shtohen
dëshmitë e dashurisë për Papën Vojtila, me të njëjtin ritëm vijon edhe Çështja e lumnimit
të Shërbëtorit të Zotit, Gjon Palit II. Po në ç’ pikë është arritur deri tani? Të
ndjekim postulatorin e Çështjes, Imzot Slavomir Oder, në mikrofonin e Radios
sonë: *** - Pas hapjes së çështjes, natën e Shën Pjetrit e të Shën Palit, dhe
krijimit të gjykatës përkatëse, nisi pa humbur kohë puna e kësaj gjykate. U përpilua
lista e dëshmitarëve e filluan të dëgjohen dëshmitë e tyre. Tani jemi pikërisht në
fazën e dëgjimit të dëshmitarëve, ndërsa paralelisht, punon edhe komisioni historik,
i cili po mbledh dokumentet që lidhen me Shërbëtorin e Zotit. E pastaj, rruga e tretë
që po ndiqet, është ajo e mrekullisë: çështja është hapur në Francë. *** -
A mund të na thoni diçka më shumë për këtë çështje? *** - Bëhet fjalë për
zhdukjen e simptomave të sëmundjes së Parkinsonit, nga e cila kishte nisur të vuajë
prej disa vitesh një murgeshë e re. Pas lutjeve të lartuara nga e gjithë bashkësia
për ndërmjetësim – këto shenja u zhdukën menjëherë e plotësisht. *** -
Monsinjor Oder, a mund të shpejtohet koha e procesit për lumnimin e Gjon Palit II? *** -
Absolutisht jo. Do të ishte një punë e nxituar. Bëhet fjalë për një personalitet tepër
të njohur, jashtëzakonisht të madh, që ka lënë gjurmë të pashlyera në historinë e
Kishës e të njerëzimit; e numri i dëshmitarëve nuk është i pakët. Vështirësitë teknike
për të koordinuar planin e punës të gjykatës me atë të dëshmitarëve nuk na lejojne,
tani për tani, të bëjmë kurrfarë parashikimi në këtë drejtim.