Sot Kisha Katolike
përkujtoi Shën Turibin e Mongrovejos. Turibio Alfonsi, i lindur në gjirin e një
familjeje të njohur fisnike në vitin 1583, studioi në universitetet më të famshme
të Spanjës; në Valladolid, në Salamankë e në Santiago të Kompostelës, ku u doktorua
në drejtësi. Si avokat i shkëlqyer, mbreti Filipi II e emëroi gjykatës në Granadë
të Spanjës. Por më pas, duke pasur nevojë për një kryeipeshkëv, të cilit mund t’i
besonte, në trojet e pushtuara nga Spanjollët në Amerikën Latine, ia paraqiti Papës
si kandidatin e vetëm për këtë mision. E përfundoi shtegtimin e tij tokësor më 23
mars 1606, në një kapelë të vogël në rrethinat e qytetit të Limës, në mes të indianëve,
si të donte që të gjithë ta mësonin se i deshi varfanjakët e tij deri në fund të fundit.
Ishte e Premtja e Madhe. Ndërsa jepte shpirt, eprori i tij luante në harpë psalmet
116 dhe 31. Gjatë shtegtimit në rrugët e Amerikës Latine, pati përshkuar më se
15 mijë kilometra, pati pagëzuar 60 mijë besimtarë, ndërmjet të cilëve, tre shenjtorë:
Shën Rozën e Limës, Shën Françesk Solanon dhe Shën Martin de Porres-in. Motua e
Turibit ishte: “Koha është e vetmja pasuri që kemi prandaj duhet ta llogarisim me
kujdesin më të madh”. U shpall shenjt më 1726 nga Papa Benedikti XIII