Apostujt janë dëshmitarë të Krishtit në mbarë botën; në audiencën e përgjithshme,
Papa bëri thirrje edhe për të ndihmuar të sëmurët nga turberkulozi
(22. 03. 06 R.V.) ‘Dëshmitarë të
Jezusit deri në kufijtë më të largët të Tokës’: në audiencën e sotme të përgjithshme,
Papa Benedikti XVI ia kushtoi katekizmin rolit të Apostujve të dërguar nga Krishti.
Ati i Shenjtë bëri edhe thirrje për t’i ndihmuar të sëmurët nga tuberkulozi.***Kumtimi
i shëlbimit i përket gjithë botës e apostujt – të Dymbëdhjetët e fillimit, ashtu si
apostujt e sotëm, e kanë për detyrë të jenë dëshmitarë të Krishtit deri në kufijtë
më të skajshëm të tokës. Kjo është edhe sinteza e katekizmit, mbajtur sot paradite
nga Benedikti XVI në Sheshin e Shën Pjetrit në praninë e 35 mijë besimtarëve. Në përfundim
të audiencës së përgjithshme, Papa bëri thirrje për të sëmurët nga tuberkulozi, posaçërisht
për më të varfërit, duke kërkuar për ta mjekime të përshtatshme e solidaritet. *** Të
rrish me Jezusin, deri sa të bëhesh ekspert, për ta dëshmuar më pas Atë – e jo një
ide – në të katër anët e botës, sepse shëlbimi i Tij është për të gjitha kombet. Përshkrimi
që Bendikti XVI u bëri Apostujve në audiencën e përgjithshme, është gati-gati një
identikit shpirtëror i ungjillëzuesit të sotëm. Papa vijoi të zhvillonte fillin e
katekizmit të filluar të mërkurën e kaluar, kushtuar lidhjeve ndërmjet Apostujve dhe
Kishës, duke reflektuar këtë herë mbi rolin e të ‘dërguarve’, që karakterizon jetën
e të Dymbëdhjetëve. Si kujtoi fragmentet ungjillore, që rrëfejnë thirrjen e nxënësve
të përqendruar në punë e më pas peshkimin e mrekullueshëm, Ati i Shenjtë përshkroi
rrethanat që e çojnë një grup peshkatarësh nga puna me rrjetat në ndjekjen e Krishtit:***
“Posaçërisht peshkimi i mrekullueshëm përbën një rrethanë të drejtpërdrejtë dhe
ofron simbolin e misionit të peshkatarëve të njerëzve, që u besohet Apostujve. Fati
i këtyre “të thirrurve”, tani e tutje, do të jetë i lidhur ngushtësisht me atë të
Jezusit. Apostulli është njeri i dërguar, por, para kësaj, ekspert i Jezusit”.***Ndërmjet
ungjilltarëve, Gjoni paraqet një skenë të ndryshme të thirrjes për të ndjekur Jezusin.
Kjo thirrje ndodh në bregun e Jordanit, ku është Shën Gjon Pagëzuesi ai që ia tregon
Mesisë apostujt e ardhshëm. E në atë ‘ejani e do të shikoni’ me të cilën Jezusi i
fton ta ndjekin, përmblidhet – shpjegoi Papa – gjithë kuptimi i thellë i zgjedhjes
së tyre:***“Aventura e Apostujve fillon kështu, si takim i njerëzve që ia hapin
zemrën njëri-tjetrit. Nis për nxënësit njohja e drejtpërdrejtë e Mësuesit. Ata, në
të vërtetë, nuk duhet të jenë lajmëtarë të një ideje, por dëshmitarë të një vetje.
Para se të dërgohen për të ungjillëzuar, duhet të rrinë me Jezusin, duke krijuar me
të një lidhje personale. Mbi këtë bazë, ungjillëzimi nuk do të jetë tjetër, veçse
kumtim i asaj që është jetuar dhe ftesë për të hyrë në misterin e bashkimit me Krishtin:
për t’u afruar e për të mësuar ku banon, për ta njohur, për ta parë e për të kuptuar,
kështu, se ai është Mesia”.***Kumtim e mister që u përket njerëzve të të gjitha
epokave e të gjitha viseve – theksoi Papa – pavarësisht nga një farë kritike me frymëzim
racionalistik, sipas së cilës në misionin e Jezusit, drejtuar fillimisht bashkëvendësve,
mungon vetëdija universalistike e Nazarenit. Nuk është aspak fjala për këtë – shpjegoi
Papa – por kufizimi fillestar i misionit të Jezusit dhe të tijve në Izrael, bëhet
shenjë profetike më efikase e një shëlbimi që u takon të gjithëve:***“Pas Mundimeve
dhe Ngjalljes së Krishtit, kjo shenjë do të sqarohet. Karakteri universal i misionit
të Apostujve do të bëhet plotësisht i qartë. Krishti do t’i dërgojë apostujt në mbarë
botën, ndër të gjithë popujt, deri në viset më të largëta të tokës, e ky mision vijon
gjithmonë, është mandati i Zotit për t’i bashkuar popujt në unitetin e dashurisë së
tij e të fesë së tij. Kjo është shpresa jonë e ky, mandati ynë, të japim ndihmesën
për këtë universalitet, për këtë bashkim të vërtetë, në pasurinë e kulturave, në bashkim
me Zotin tonë të vërtetë, Jezu Krishtin”. ***Audienca e përgjithshme, që nisi
me notat e një kompleksi bandistik, përfundoi me të njëjtat nota, ndërsa ndërmjet
përshëndetjeve në gjuhë të ndryshme, kujtojmë atë që Papa i drejtoi dioqezës italiane
të Komos, udhëhequr nga ipeshkvi Alesandro Magjolini si dhe thirrjen në prag të Ditës
Botërore të OKB-së për luftën kundër tuberkulozit, që do të kremtohet pasnesër. Sipas
të dhënave të fundit të OMS-it (Organizatës Botërore të Shëndetit) TBC-ja është sëmundja
më e përhapur pas Sidës. Shkakton 5 mijë viktima në ditë, dy milion në vit, posaçërisht
ndërmjet njerëzve që jetojnë në mjerim:***“Është një rast i përshtatshëm për të
nxitur impenjimin në nivel global, që të sigurohen burimet e nevojshme për t’i mjekuar
këta vëllezër të sëmurë, të cilët shpesh jetojnë në kushte të një varfërie të madhe.
Inkurajoj nismat e ndihmës e të solidaritetit për njerëzit që vuajnë nga kjo sëmundje,
duke uruar që t’u sigurohen gjithnjë kushte dinjitoze jetese”.