Përshëndetja e Papës murgjërve të Montekasinos për Festën e Shën Benediktit, Pajtor
i Evropës
(21. 03. 06 R.V.)
Papa u jep bekimin e tij apostolik murgjërve benediktinë, të cilët kremtuan festën
e themeluesit të tyre, duke e ngarkuar Kardinalin Pol Pupard, që kryesoi sot paradite
kremtimin solemn në abacinë e Montekasinos, t’i sigurojë për pjesëmarrjen shpirtërore
të Benediktit XVI.
Sot Urdhëri Benediktin kremtoi themeluesin e vet, Shën
Benediktin abat. Në këtë datë, që përkon me fillimin e pranverës, kujtohet kalimi
i Pajtorit të Evropës në shtëpinë e Atit Qiellor, ndërsa solemniteti i Shenjtit festohet
më 11 korrik. Papa i dërgoi përshëndetjet e tij dhe bekimin apostolik murgjërve të
Monte Kasinos, duke deleguar kardinalin Pol Pupard, kryetar i Këshillit Papnor të
Kulturës, i cili kremtoi atje Meshën solemne sot paradite, ndërsa pasdite në qytezën
e vogël u organizua një procesion për nder të Shën Benediktit . Në përfundim Abati-ipeshkëv,
Bernardo D’Onorio i dha mbarë Evropës bekimin me Reliken e Shenjtit. *** “Papa
më ngarkoi t’ju shpreh të gjithëve afërsinë tij në lutje, pjesëmarrjen e tij shpirtërore
në këtë kremtim, interesimin e tij të vazhdueshëm e të thellë për fatet e Evropës
e të popujve që e përbëjnë”. Me këto fjalë kardinali Pupard u përcolli të pranishmëve
në festë përshëndetjet e Benediktit XVI, duke kujtuar lidhjen e thellë dhe nderimin
që ka Papa për Atin e monakizmit perëndimor, gjë të cilën e tregon edhe emri që zgjodhi.
Shenjti – ka thënë Papa, përbën një pikë themelore referimi për bashkimin e Evropës
dhe na kujton fuqimisht rrënjët e krishtera të kulturës e të qytetërimit të saj. Posaçërisht
kardinali nënvizoi citimet e vazhdueshme nga ana e Papës të Regullit të Shën Benediktit,
i cili kërkon të mos i kundërvihet asgjë Krishtit. Duke kujtuar enciklikën e Benediktit
XVI “Dio Caritas est”, kardinali theksoi me forcë se vetëm duke vënë në plan të parë
dashurinë, që e ka masën e vet të plotë e të përkryer në Krishtin, mund të promovohen
paqja, harmonia dhe dialogu ndërmjet popujve e kulturave si dhe bashkëpunimi e solidariteti
ndërmjet vendeve më të zhvilluara ekonomikisht e atyre që kanë nevojë për mjetet më
të domosdoshme të jetesës. Shën Benedikti, i frymëzuar nga Zoti, iu kushtua ndërtimit
të qytetit ungjillor të vendosur përmbi mal, vijoi kardinali Pupard, në mënyrë që
të mund t’i ndriçonte mbarë popujt, duke i bërë të zhvillohen në harmoni vëllazërore
e në paqe. Së fundi kardinali Pupard kërkoi ndërmjetësimin e Pajtorit të Evropës për
këtë çast të veçantë historik, që karakterizohet nga konfliktet e nga dhuna, nga moskuptimet
e përçarjet, në mënyrë që, sipas shembullit të Shën Benediktit, të mund të ndërtohet
në paqe qyteti i njerëzve, në të cilin dashurisë së Krishtit nuk i kundërvihet asgjë!