Rëndësia e punës për realizmin e njeriut dhe për zhvillimin e shoqërisë”: Papa flet
për Shën Jozefin në Meshë dhe në lutjen e Engjëllit të Tënzot. Një mendim për 500-vjetorin
e Muzeve të Vatikanit
(19. 03. 06 R.V.) “Puna ka rëndësi
të dorës së parë për realizmin e njeriut dhe për zhvillimin e shoqërisë”: kështu u
shpreh sot Papa Jozef Ratzinger i cili, gjatë Meshës solemne dhe lutjes së Engjëllit
të Tënzot, foli shumë për Shën Jozefin; ndërsa pas lutjes mariane, kujtoi 500-vjetorin
e Muzeve të Vatikanit. “Puna ka rëndësi të dorës së parë për realizimin e njeriut
e për zhvillimin e shoqërisë dhe, për këtë arsye, duhet të jetë gjithnjë e organizuar,
e kryer në kushte që respektojnë plotësisht dinjitetin e njeriut dhe që i shërbejnë
së mirës së përbashkët”. Kështu u shpreh Benedikti XVI në homelinë e Meshës solemne,
kremtuar sot paradite në Bazilikën e Shën Pjetrit në Vatikan. Në Meshë, meditimet
e teksteve liturgjike të së dielës së tretë të Kreshmëve u bashkuan me kujtimin e
Shën Jozefit, duke shpjeguar se solemniteti liturgjik është shtyrë për nesër e duke
iu lutur Shenjtit t’i mbrojë punëtorët e gjithë botës. *** “Veprimtaria punonjëse
duhet t’i shërbejë të mirës së vërtetë të njerëzimit, duke krijuar kushte që njeriu
“si individ e si anëtar i shoqërisë ta kultivojë e ta realizojë plotësisht vetveten”.
Papa i nënvizoi këto fjalë të cituara nga Gaudium et Spes, pasi shpjegoi se
solemniteti i Shën Jozefit të kujton punën, kusht i zanafillës së njeriut. E, lidhur
me këtë, pohoi: *** “Kisha ka treguar gjithnjë, e posaçërisht në shekullin
e fundit, vëmendje e kujdes për këtë fushë të shoqërisë, siç e dëshmojnë dokumentet
e shumta shoqërore të papëve dhe veprimtaria e një numri të madh shoqatash me frymëzim
të krishterë”. *** E këto shoqata Papa i përshëndeti përzemërsisht dhe shprehu
kënaqësinë për faktin se shumë prej tyre ishin të pranishme në Meshë, si përfaqësuese
të mbarë botës së punëtorëve. E pikërisht duke pasur parasysh botën e punës, Benedikti
XVI nënvizoi se është i nevojshëm kualifikimi teknik e profesional dhe një rend shoqëror
i drejtë, që kujdeset për të mirën e të gjithëve; por jo vetëm kaq: *** “Duhet
jetuar një përshpirtëri, që i ndihmon besimtarët të shenjtërohen përmes punës së tyre,
duke i përngjarë Shën Jozefit, të cilit i duhej të mendonte çdo ditë për të plotësuar
nevojat e Familjes Shenjte me punën e duarve të veta; prandaj Kisha e ka zgjedhur
Pajtor të punëtorëve”. *** Dëshmia e Shën Jozefit – shtoi Papa – na tregon
se njeriu është subjekt dhe protagonist i punës dhe në vijim theksoi: *** “Dëshiroj
t’ia besoj atij të rinjtë që nuk e kanë të lehtë të gjejnë vendin e tyre në botën
e punës, të papunët dhe të gjithë ata që vuajnë për shkak të vështirësive të krijuara
nga kriza e përhapur e papunësisë”. *** Njëkohësisht – vërejti Benedikti
XVI – është e domosdoshme që njeriu të mos bëhet shërbëtor i punës, mos ta kthejë
në idhull, duke pretenduar të gjejë në të kuptimin e mbram të jetës. Papa kujtoi,
në vijim, se në Bibël shkruhet: “Gjashtë ditë puno e kryej të gjitha punët e tua;
kurse e shtata ditë është e shtuna e Zotit, Hyjit tënd” (Dal. 20, 8-9). Është një
fragment i Librit të Daljes, që përfshin edhe tregimin në të cilin përshkruhet sesi
Zoti i dorëzoi Izraelit Dhjetë Urdhërimet. Ishte pikërisht kjo faqe që u lexua sot
gjatë kremtimit eukaristik. E Papa në homeli e quajti Dekalogun “konfirmim të lirisë
së fituar”. Dhjetë Urdhërimet – shpjegoi Ati i Shenjtë – po t’’i shikojmë thellë,
janë mjet që Zoti na jep për të mbrojtur lirinë tonë, si nga kushtëzimet e brëndshme
të pasioneve, ashtu edhe nga padrejtësitë e jashtme të atyre që kanë qëllime të këqija. Në
përfundim të Meshës, Ati i Shenjtë tha lutjen e Engjëllit të Tënzot, duke kujtuar
kryesisht festën e Shën Jozefit, që ishte edhe dita e emrit të tij e prandaj Papa
Jozef Ratzinger mori urime nga të katër anët e botës. Bashkojmë edhe ne zërin me urimet
që vijojnë t’i arrijnë Benediktit XVI, të cilit në pagëzim iu vu emri Jozef, gjë që
e lidhi për gjithë jetën me figurën e Shën Jozefit.