Shkëmbim i përzemërt mesazhesh ndërmjet Benediktit XVI dhe Patrikut të Moskës, Aleksejt
II: urohet një bashkëpunim gjithnjë më i dendur në vërtetësi e dashuri dhe një dëshmi
e përbashkët
(17. 03. 06 R.V.) Shkëmbim i përzemërt mesazhesh ndërmjet Benediktit XVI dhe Patrikut
të Moskës e të gjithë Rusive, Aleksejt II, të cilët urojnë një bashkëpunim gjithnjë
më të dendur dhe një dëshmi të përbashkët të krishterë përballë sfidave të rënda të
kohës sonë. Shkëmbimi i mesazheve u realizua gjatë vizitës në Moskë të kardinalit
Etçegarai që mori pjesë, më 24 shkurtin e kaluar, në liturgjinë solemne kremtuar pranë
katedrales të Shën Shëlbuesit me rastin e ditëlindjes dhe ditës së emrit të Patrikut
Aleksej II. Papa, duke shprehur urimin e tij të përzemërt për festën e dyfishtë,
iu lut Zotit t’i japë bekime të begata Patrikut dhe ministerit të tij “kushtuar bujarisht
çështjes së Ungjillit”. Gjestet dhe fjalët e vëllazërisë së përtërirë ndërmjet
barinjve të grigjës së Zotit – shkruan Benedikti XVI – na tregojnë se bashkëpunimi
gjithnjë më i ngushtë në vërtetësi e në dashuri kontribuojnë për të rritur frymën
e bashkimit, që duhet t’u prijë hapave të të gjithë të pagëzuarve. Bota e sotme –
pohon Papa – ka nevojë të dëgjojë zëra që i tregojnë rrugën e paqes, të respektit
për të gjithë, të dënimit të çdo lloj dhune, të dinjitetit të çdo njeriu dhe të drejtave
që i përkasin që nga lindja. *** Në letrën e përgjigjes, Patriku Aleksej II
e falënderon përzemërsisht Papën për urimet e ngrohta dhe për kujtimin në lutje. Në
kohën tonë, kur shekullarizmi po zhvillohet me vrull - nënvizon Aleksej II – krishterimi
gjindet përballë sfidave të rënda, që kërkojnë një dëshmi të përbashkët. Jam i bindur
– shton Patriku i Moskës - se një nga detyrat parësore të Kishave tona, që kanë vizion
të përbashkët për probleme të shumta aktuale të botës bashkëkohore, duhet të jetë
sot mbrojtja dhe afirmimi brënda shoqërisë i vlerave të krishtera, me të cilat njerëzimi
jeton që prej më se njëmijë vjetësh. Shpresoj - përfundon Aleksej II – se për këtë
do të ndihmojë edhe zgjidhja e problemeve që ekzitojnë akoma ndërmjet dy Kishave.
*** Me këtë rast, Benedikti XVI i dhuroi Patrikut medaljen e artë të papnisë
së tij, ndërsa Aleksej II i dërgoi Atit të Shenjtë një kryq kraharori, si shenjë mirënjohjeje
e nderimi.