Papa në lutjen e Engjëllit të Tënzot: dëgjojeni Krishtin, posaçërisht në kohën e Kreshmëve
(12. 03. 06 R.V.) Dje, në lutjen e Engjëllit të Tënzot, Papa Benedikti XVI i ftoi
besimtarët ta dëgjojnë Krishtin e t’i binden zërit të tij, posaçërisht në kohën e
Kreshmëve, sepse në rrjedhën e jetës sonë nuk mungojnë çastet e errësirës, që nganjëherë
bëhet tepër e dendur.
“Ta dëgjojnë Krishtin e t’i binden zërit të Tij”:
kjo është ftesa që Papa Benedikti XVI u bëri dhjetra mijëra besimtarëve e turistëve
të mbledhur në Sheshin e Shën Pjetrit, nën rrezet e një dielli të ftohtë dimëror,
për të thënë së bashku me Atin e Shenjtë lutjen mariane. *** Papa tregoi përvojën
e tij të përgatitjes për Kreshmët, që përfundoi të shtunën e kaluar dhe kujtoi ushtrimet
shpirtërore të predikuara në Pallatin Apostolik nga kardinali Marko Çé, Patrik nderi
i Venedikut: *** “Ishin ditë, të cilat iu kushtuan tërësisht dëgjimit të
Zotit, që na flet gjithnjë, por pret nga ne më shumë vëmendje, posaçërisht në këtë
kohë Kreshmësh.” *** Kur njeriu ka hirin të provojë një përvojë të fuqishme
të Hyjit – shpjegoi Ati i Shenjtë – ndjen po atë që ndjenë nxënësit e Jezusit kur
Zoti u shndërrua përpara syve të tyre mbi malin Tabor: “Për një çast shijohet diçka
e ngjashme me atë që do të jetë lumnia e Parajsës”. Është fjala për pak çaste të kësaj
përvoje – shtoi Papa – të cilat Zoti nganjëherë i lejon, posaçërisht përballë provave
të rënda. Por askujt, veç, nuk i është dhënë mundësia të jetojë “mbi Tabor” ndërsa
është gjithnjë mbi këtë tokë”. *** “Jeta njerëzore, në të vërtetë, është
një rrugë feje e, si e tillë, rrjedh më shumë në gjysmë hije, sesa në dritë të plotë,
e nuk i mungojnë edhe çastet e errësirës, madje të errësirës së plotë”. *** Prej
këndej mund të pohojmë se lidhja jonë me Zotin zhvillohet më shumë në dëgjim sesa
në vegim; i njëjti kundrim realizohet si me sy mbyllë, në sajë të dritës së brëndshne
që ndez në ne fjala e Zotit. Kështu edhe Virgjëra Mari, krijesa njerëzore që i qëndroi
më pranë Zotit, eci ditë për ditë në një shtegtim feje. E atëherë mund të themi se
duhet ta dëgjojmë Jezusin si Virgjëra Mari: kjo është dhurata e ky impenjimi për secilin
nga ne në periudhën kreshmore - porositi Benedikti XVI. Duhet ta dëgjojmë Krishtin
në Shkrimin Shenjt e ndër ngjarjet e jetës sonë, për të lexuar mesazhet e Provanisë
hyjnore, ta dëgjojmë ndër vëllezërit, posaçërisht ndër të vegjlit e të varfërit, ku
Jezusi kërkon dashuri konkrete: *** “Të dëgjosh Krishtin e t’i bindesh zërit
të Tij: kjo është udha kryesore, e vetmja, që çon në gëzimin e plotë të dashurisë”.