(12. 03'06 R. V.) Sot, e Diela II e Kreshmëve, Kisha katolike përkujtoi Shën Maksimilianin,
martir dhe Shën Inoçencin, papë. Nesër, e hënë, do të kremtojë Shën Sabinin,
martir; Shën Kristinën, martire dhe Shën Leandrin, ipeshkëv i Seviljes, të cilët në
këtë kohë pendese na kujtojnë uratën zgjetore: “Na fal, o Zot, në mëshirën tënde!”.
Të martën do të përkujtohen Shën Matilda, mbretëreshë dhe i Lumi Plaçido Rikardi,
murg në bazilikën e Shën Palit jashtë mureve të Romës. Liturgjia e së kremtes së tyre
na sjell ndër mend fjalët e Krishtit: “Mjerë ju, që thoni e nuk bëni, paraqiteni si
mësues, por nuk jetoni ashtu si mësoni e nuk ju pëlqen të bëheni të vegjël, për të
shërbyer!”. Të mërkurën e ardhshme do të përkujtohen Shën Zakaria, papë dhe Shën
Luiza Marijak, bashkëthemeluese e Bijave të Bamirësisë, jeta e të cilëve ishte një
lutje e vazhdueshme drejtuar Zotit, duke pranuar me gjithë zemër në shpirtin e në
korpin e tyre, mundimet e Krishtit. Të enjten do të kremtohen Shenjtorët Hilari
e Taciani, martirë të Akuilesë, festa e të cilëve na kujton shembëlltyrën e njeriut
të pasur e Lazrit të varfër, që tingëllon si ftesë e fuqishme drejtuar të pasurve
për ta kuptuar përgjegjësinë e tyre. Të premten e ardhshme Kisha katolike do të
kremtojë Shën Patrikun, ipeshkëv, Apostull i Irlandës dhe Shën Gjon Sarkanderin, ipeshkëv
e martir, që na kujtojnë se Biri i Zotit persekutohet e mohohet nga bota, nga ata
që interesohen vetëm për mirëqenien e tyre, por megjithkëtë, Jezusi do të jetë guri
i themelit i Kishës. E kremtja e Shën Çirilit, ipeshkëv i Jeruzalemit e doktor
i Kishës dhe Shën Anselimit, ipeshkëv i Lukës, të shtunën e ardhshme, na kujton se
Krishti, i mirë e i madh në dashuri, vë gjithnjë në qëndër të vëmendjes njeriun, si
bir që Ati e do e e kërkon vazhdimisht.