Kardinali Cé në ushtrimet shpirtërore në Vatikan: në se errësohet besimi në Ringjalljen,
shembet shpresa e krishterë
Në se errësohet
besimi në ngjalljen e Jezusit, shembet shpresa e krishterë, për t’i hapur rrugën mesianizmave:
kështu u shpreh sot kardinali Marco Cé gjatë meditimeve të ushtrimeve shpirtërore
të Kreshmëve, të cilat Patriku i Venedikut është duke i predikuar që të hënën e kaluar
në prani të Papës e të Kuries Romake në Vatikan.***Për katër ditë me radhë meditimet
ndoqën kronikën e Shën Markut Ungjilltar i cili, që nga episodi i pagëzimit në Jordan
deri tek ngjarjet në Çezaré të Filipit, përshkruan madhështinë e Jezusit-Mesi, që
kumton mbretërinë e Hyjit duke kryer shumë mrekulli. Sot, e premte, dita e pestë e
ushtrimeve shpirtërore, skena ndryshoi. Kardinali u ndalua tek vetmia e plotë e Jezusit
para se të kryqëzohej, tek Kryqëzimi, zbritja në varr dhe ngjallja në të tretën ditë. Me
emocion të thellë Patriku i nderit i Venedikut përshkroi gjendjen psikologjike e njerëzore
në të cilën Krishti i afrohet kapjes dhe vdekjes. E vetmia morale e Jezusit vijon
me mundimet fizike në udhën e Kalvarit. Për të gjithë ai është i munduri. Por pasi
ka dhënë frymën e fundit, historia e Ungjillit të Shën Markut ndryshon përsëri. Dy
janë shenjat kryesore që tregojnë, pa kurrfarë dyshimi, se ky ekzekutim mbi Golgotë
nuk është si të tjerët: tisi i tempullit që griset dhe habia e anmikut të parë të
penduar, Çenturionit:*** “Është përmbushja e të gjitha Shkrimeve Shenjte; çka
ishte e përkohshme e profetike, i lë vendin realitetit. Vdekja e Jezusit për dashuri,
realizon plotësisht planin e shëlbimit të cilin Ati e deshi që nga amshimi. E Çenturioni,
i cili ndodhet përballë të Kryqëzuarit, duke e parë mënyrën si dha frymën e fundit,
nuk mundi të mos thoshte: “Vërtetë ky njeri ishte Biri i Zotit”. Në këtë besojmë të
Çenturionit vezullon drita e Pashkëve”.***Më pas kardinali Cé u ndal tek habia
e grave para varrit të zbrazur:***“Që Jezusi, Krishti, Biri i Zotit të jetë ‘Lajmi
i mirë’, kjo varet pikërisht nga fakti se i Kryqëzuari nuk mbeti në varr, por u ngjall.
Ai, që të gjithë e gjykonin si të mundur, është vërtetë Krishti, vërtetë Biri i Hyjit,
ashtu si kishte thënë. I gjithë Ungjilli i Shën Markut ndriçohet nga ngjallja e të
Kryqëzuarit: e keqja është mundur, vdekja – vula e saj - është shpartalluar!”***Dymijë
vjet më pas – përfundoi me një nxitje kardinali Cé – në zemrën e gjithë të krishterëve
duhet të rijetojë çdo ditë mrekullimi i grave para varrit të zbrazët. Aty e askund
tjetër, është rrënja e fesë.