Ndjekja e Krishtit dhe dhembshuria e Hyjit për njeriun ndër reflektimet e kardinalit
Cé në ushtrimet shpirtërore të Kreshmëve në Vatikan.
Ndjekja e Krishtit, falja e mëkateve e pajtimi janë temat e Kreshmëve që frymëzuan
ditën e dytë të ushtrimeve shpirtërore, predikuar Benediktit XVI dhe Kuries Romake
nga kardinali Marko Cé.
Sot, për Benediktin XVI dhe
Kurien Romake ishte dita e dytë e ushtrimeve shpirtërore kreshmore në Vatikan. Në
meditimin e sotëm, Patriku i nderit i Venedikut, kardinali Marko Cé, predikatar i
Ushtrimeve – u përqëndrua tek tema e thirrjes së nxënësve të Krishtit, sipas rrëfimit
të Ungjillit të Shën Markut si dhe tek tema e faljes së mëkateve, dy aspekte karakteristike
për Kohën e Kreshmëve. *** Thirrja e Jezusit drejtuar nxënësve është një nga
figurat-simbol të jetës së fesë. Është e tillë, sepse tregon disa nga elementet që
e bëjnë të krishterin ndjekës të Krishtit, si pendesën e plotë, shkëputjen nga rruga
e gabuar, nismën absolute të Jezusit në çastin e thirrjes dhe njëkohësisht “sundimin”
e Krishtit mbi njerëzit, të cilëve është duke u drejtuar një kumtim të padëgjuar ndonjë
herë. Në fillim Kardinali Cé përshkroi skenën në të cilën fiton pjekurinë thirrja
e të Dymbëdhjetë Apostujve - Galilenë, tokë e njerëzve të varfër, që nuk vlerësohej
nga judejtë, por që Jezusi e zgjedh si teatër të misionit të tij. Përvujtëria, në
kontrast me mburrjen e njerëzve, është tipar i përhershëm i jetës së Krishtit. Njerëzit
që zgjedh janë peshkatarë, jeta e të cilëve tronditet nga tri fjalë: *** “Tri
fjalët: pendohuni, besoni dhe lajmi i mirë – lidhen ngushtë ndërmjet tyre. Kuptimi
më rrënjësor i pendesës, për të cilën na ftojnë Kreshmët, është ndjekja e Krishtit.
Të pendohesh nuk do të thotë thjeshtë të bësh kthesë morale në jetë. Pendesa është
më tepër një orientim i ri i jetës drejt personit të adhuruar të Zotit Jezus, është
hapje e plotë e shtigjeve të jetës për Jezusin, është dhurim i jetës për Krishtin”. *** Duke
iu afruar së pari Pjetrit dhe shokëve të tjerë të udhës, Jezusi i trondit bindjet
e epokës. Rabinët nuk bënin kështu me nxënësit e tyre – shpjegoi kardinali Cé. Por
ky stil është i nevojshëm për një kumtim plotësisht të ri të Mbretërisë së Zotit,
që përgatitet të bëjë Krishti. E këtu Patriku nënvizoi edhe karakterin krejtësisht
të ri të ‘sundimit’ të Jezusit mbi nxënësit e vet: një akt që nuk shtyp, por çliron,
që kërkon përgjigje të menjëhershme e të plotë, që të fton ta ndjekësh. Në meditimin
e dytë predikatari kaloi nga Galileja në Kafarnao, në shtëpinë e Pjetrit, ku kryhet
mrekullia e shërimit të ulokut. Kardinali tërhoqi vëmendjen e dëgjuesve tek personazhet
e kësaj skene, që janë paralitiku, i cili nuk flet, sepse gjithë qenia e tij shpreson
tek Mësuesi që mund ta shërojë dhe katër njerëzit, që e mbartin. Ata hapin një vrimë
në çatinë e shtëpisë për ta afruar të sëmurin tek Jezusi. E feja e tyre e prekë thellë
Krishtin. E prek thellë edhe solidariteti, simbol i dhembshurisë që rijeton në Kishë
e në njerëzit e saj të shuguruar. Mrekullia e Jezusit kryhet në rrethana armiqësore.
Farizejtë që janë të pranishëm, e gjykojnë në heshtje Jezusin si blasfemues, që ia
falë mëkatet paralitikut. Shërimi nga sëmundja dhe falja e mëkatve – theksoi kardinali
Cé – lidhen ngushtë njëra me tjetrën. Mëkati është rrënja e çdo të keqeje njerëzore,
ndërsa falja e pajtimi, rrëfyer në Ungjill, janë dy shtyllat e Kreshmëve: ***“Falja
e mëkateve është dhuratë e Pashkëve të Krishtit e njëkohësiht edhe pjesëmarrje reale
në ngjalljen e tij. E Krishti ka pushtet t’i falë mëkatet. Ky pushtet ishte vetëm
në qiell, ndërsa tani, me Jezusin, është edhe mbi tokë".