Dy atentate tronditën
sot Karaçin, kryeqytetin e Pakistanit. Dy bomba shpërthyen në afërsi të ambasadës
amerikane. Si pasojë u vranë pesë vetë, përfshi këtu edhe një diplomat amerikan. Atentatet
u kryen në prag të vizitës së presidentit amerikan Xhorxh Bush në këtë vend, cili
nga ana e tij deklaroi se ky atentat nuk do ta pengojë të vizitojë Azinë. Në Irak
një bombë shpërtheu në një lagje shiite të Bagadadit. Nga shpërthimi u vranë 8 persona.
Pak më vonë një tjetër bombë shpërtheu në një autobus duke vrarë pesë udhëtarë. Edhe
këto atentate vlerësohen të jenë në vazhdën e hakmarrjeve të përgjakshme mes shiitëve
dhe sunitëve që tash dy javë nuk ndalen në Irak. Në bazë të kompentencave kushtetuese
dhe sipas marrëveshjes mes dy partive, Lidhjes Demokratike të Kosovës dhe Aleancës
për Ardhmërinë e Kosovës, Presidenti Fatmir Sejdiu emëroi z. Agim Çeku kryeministër.
Në njoftimin për shtyp të presidencës së Kosovës thuhet se presidenti i kërkon kryeministrit
të ri të formojë sa më shpejt qeverinë e re në bazë të marrëveshjes së koalicionit
qeverisës. Vazhdon të jetë tepër e acaruar situata në parlamentin shqiptar. Pas
ndërhyrjes së djeshme të Gardës së Republikës në ambientet e Kuvendit, sot drejtuesi
i punimeve të parlamentit Fatos Beja, mes protestave të shumta të opozitës, pezulloi
për dy javë nga pjesëmarrja në parlament deputetët socialistë Erjon Braçen, Bashkim
Finon, Ndriçim Kullën dhe Pilo Kerrin, dhe më pas mbylli seancën.