Jeta, familja, formimi i meshtarëve: këto ishin temat në qendër të takimit të Benediktit
XVI me klerin romak
Sot paradite, më2 mars në Sallën e Bekimit në Vatikan, një takim shumë i përzemërt:
ai i Papës Benedikti XVI me klerin e dioqezës së Romës. Benedikti XVI bisedoi
drejtpërdrejtë me famullitarët e Romës, duke iu përgjigjur pyetjeve të tyre për 2
orë me radhë. Kujtojmë se famullitë e dioqezës së Romës janë më se 330, ndërsa meshtarët
e pranishëm në kryeqytet - rreth 5. 500. Ishte takim gjatë të cilit Papa e famullitarët
u ndalën tek sfidat e mëdha që duhet të përballojë sot Kisha e Romës, por edhe bisedë
e përzemërt vëllazërore, siç e quajti vetë Shenjtëria e Tij. Takimi nisi me një
çast simpatik, gjatë të cilit u lexua një tingëllimë shkruar prej njërit nga famullitarët,
kushtuar Papës Benedikti XVI dhe paraardhësit të tij të dashur, Gjon Palit II. Familja,
ballafaqimi me rininë, formimi i meshtarëve të rinj: këto ishin temat kryesore që
prekën 15 famullitarët, të cilët kërkuan nga Ati i Shenjtë reflektime, këshilla
por edhe inkurajim. Shumë prej tyre, duke nisur nga vetë Papa dhe kardinali vikar
Kamilo Ruini, kujtuan dëshminë e madhe të dashurisë së krishterë të don Andrea Santoros.
Sidomos gjatë Kreshmëve – nënvizoi Shenjtëria e Tij - duhet ta ripohojmë thirrjen
tonë, zgjedhje themelore për jetën. Një botë që s’ka Zot, që e ka harruar Zotin –
vërejti Benedikti XVI – humbet jetën e bie në kulturën e vdekjes. Është rrezik, të
cilin e ka paralajmëruar prej kohe edhe Papa Vojtila në Enciklikën e tij ‘Evangelium
Vitae’ . Vetëm duke e dhuruar jetën - theksoi Ati i Shenjtë – mund ta gjejmë atë.
Ky është edhe kuptimi i fundmë i Kryqit! Më pas Papa theksoi rëndësinë që ka për
të krishterin të dhurojë vetveten. Është shenjë përvujtërie, të cilin Benedikti XVI
e kërkoi nga famullitarët në shërbimin që u bëjnë besimtarëve. Duhet ta pranojmë se
jemi të papërkryer – theksoi Papa - për të pranuar Zotin, që është dashuri. Benedikti
XVI vuri kështu theksin mbi atë që mund të bëjë Kisha për të ndihmuar familjen, qelizë
themelore e çdo shoqërie të shëndoshë. Ka shumë rëndësi – pohoi Ati i Shenjtë – t’i
mësojmë besimtarët që të luten në familje. Papa u bashkua me shqetësimin
e njërit nga meshtarët lidhur me izolimin e familjeve brënda familjes. Prandaj, vërejti
Ati i Shenjtë – është e nevojshme bashkëpjesëmarrja e Kishës për ta shpëtuar familjen.
Në përgjigjet që u dha famullitarëve, Papa u ndal edhe tek rëndësia e Adhurimit Eukaristik
që - tha Ati i Shenjtë – duhet inkurajuar gjithnjë. Pastaj, duke rikujtuar Enciklikën
e tij ‘Zoti është dashuri’, inkurajoi të gjithë ata që, duke qenë dëshmitarë të dashurisë
së krishterë, impenjohen në favor të njerëzve të varfër e të sëmurë.