Papa Benedikti XVI i shkruan Patrikut ortodoks Aleksejt II
Letrën e dorëzoi kardinali Rogjer Etçegarai, kryetar nderi i Këshillit Papnor për
Drejtësi e Paqe, i cili pak ditë më parë mori pjesë, së bashku me Imzot Peninin, përfaqësues
i Selisë së Shenjtë pranë Federatës Ruse, në kremtimet për ditëlindjen dhe ditën e
emrit të Patrikut të Moskës. Për kardinalin Etçegarai, ftesa është simbol i respektit
për Kishën katolike dhe fryt i një miqësie të përzemërt. Arrita në Moskë – i shpjegoi
kardinali agjensisë Zenit – me ftesën e Patrikut Aleksei II, me të cilin që prej tridhjetë
vjetësh më lidh një miqësi vëllazërore. Katolikë e ortodoksë – nënvizoi kardinali
Etçegarai – duhet të bashkëpunojnë krah për krah për t’i dhënë përgjigje pyetjeve
të botës së sotme e për ta përhapur sa më mirë Fjalën e Krishtit. Kur kemi parasysh
mesazhin ungjillor, duhet të jemi optimistë për ardhmërinë e shoqërisë dhe të kishave
tona. Pyetja më e rëndësishme – tha në përfundim Kardinali - është: si mund të jemi
besnikë ndaj Ungjillit të Krishtit? Për të qenë të tillë, duhet të tregohemi të guximshëm
e të mos e maskojmë ose ta fshehim fenë tonë.