“Zoti do t’i kërkojë llogari atij që derdhë gjakun e vëllait në emër të vet”. Me këto
fjalë Papa Benedikti XVI-të
në Lutjen e Engjëllit të Tenzot dënoi me forcë aktet e dhunshme që po bëhen në
emër të fesë, në mënyrë të posaçame në Irak dhee Nigeri dhe iu lut Zotit për paqen
në botë.Besimtarët ta përballojnë kohën e Kreshmëve me shpirtin e ri të atij,
që ka gjetur në Jezusin kuptimin e jetës: kështu u shpreh Benedikti XVI në lutjen
e Engjëllit të Tënzot të së dielës, i ndjekur nga mijëra besimtarë, që e kishin mbushur
përplot Sheshin e Shën Pjetrit. Por Papa bëri edhe një thirrje të fuqishme për pajtim
e paqe, posaçërisht në Irak e në Nigeri, duke pohuar se emri i Zotit nuk duhet përdorur
kurrë për të përligjur dhunën. Kurrë më luftëra në emër të Zotit: në të dielën
që i paraprin të Mërkurës së Përhime, fillimit të periudhës kreshmore, Benedikti XVI
u lut për paqen në botë. Papa kujtoi aktet e dhunës në Irak dhe sulmet kundër xhamive.
Veprime këto – pohoi që mbjellin vdekjen, ushqejnë urrejtjen dhe e pengojnë fuqimisht
veprimtarinë, edhe kështu tepër të vështirë, të rindërtimit të vendit. Më pas mendimi
i Atit të Shenjtë shkoi në Nigerinë e tronditur rëndë nga ndeshjet ndërmjet të krishterëve
e myslimanëve, që kanë shkaktuar shumë viktima dhe kanë shkatërruar disa kisha e xhami.
Prandaj Papa ripohoi me forcë se feja nuk duhet përdorur kurrë si mjet për të përligjur
dhunën: “Frytet e besimit në Zotin nuk janë antagonizmat shkatrrimtare, por fryma
e vëllazërisë dhe e bashkëpunimit për të mirën e përbashkët. Zoti, Krijues e Atë i
të gjithëve, ka për t’u kërkuar edhe më rreptë llogari atyre që derdhin, në emër të
tij, gjakun e vëllaut”. Papa, si dënoi ashpër çdo dhunim të vendeve të kultit,
ia besoi Zotit të vdekurit e njerëzit që qajnë për humbjen e të afërmve. I ftoi, më
pas, të gjithë të luten më shumë e të bëjnë më shumë pendesë në Kohën e Kreshmëve,
që Zoti ta largojë kërcënimin e konflikteve. Pikërisht kuptimit që ka Koha e Kreshmëve
për të krishterët, Papa i kushtoi pjesën kryesore të reflektimeve të tij para lutjes
së Engjëllit të Tënzot. Duke marrë shtytje nga fragmenti i djeshëm i Ungjillit mbi
temën e agjërimit, nënvizoi se Kreshmët na sjellin ndër mend mundimet e Krishtit.
U kujtoi kështu besimtarëve shpirtin me të cilin duhet ta jetojnë këtë kohë të fortë,
që na përgatitë për Pashkët e Ngjalljes. “Koha e Kreshmëve nuk duhet përballuar
me shpirt “të vjetër”, si të ishte një barrë e rëndë dhe e bezdisshme, por me shpirtin
e ri të atij që ka gjetur në Jezusin e në misterin e tij, kuptimin e jetës dhe vëren
se tashmë gjithçka duhet t’i besohet Atij”. *** Kështu bëri edhe Shën Pali Apostull,
i cili pohonte se kishte lënë gjithçka pas shpine, për të njohur Krishtin. Së fundi,
lidhur me udhën e Kreshmëve, Papa u lut që “të na prijë e të na mësojë Virgjëra Mari
e cila, kur Jezusi drejtohej vendosmërisht nga Jeruzalemi për të pësuar mundimet,
e ndoqi pas me besim të plotë” Pas lutjes së Engjëllit të Tënzot, Papa përshëndeti
në mënyrë të posaçme bashkësinë rinore të Seminarit ipeshkvnor të Trevizos, në Itali.
“Duke ndjekur shembullin e Shën Piut X, që ishte ati shpirtëror i Seminarit –u tha
Papa – ju inkurajoj ta dhuroni me gëzim jetën tuaj për Jezusin e për vëllezërit