Dashuria bashkë me fenë do të mbizotërojnë mbi mosmarrëveshjen e botës. T’i ripohojmë
së bashku vlerat kristiane në Evropë.
Janë të shumta shenjat ngushëlluese në marrëdhëniet ndërmjet Kishës katolike dhe
Kishës Ortodokse: kështu u shpreh Benedikti XVI në audiencën me Kolegjin teologjik
të Apostolici Diakonia.“Dashuria e krishterë, e bashkuar me fenë do të
dijë të fitojë mbi mospërkimet e botës” – këtë shpresë Papa Benedikti XVI e theksoi
në fjalën drejtuar studentëve dhe profesorëve të Kolegjit teologjik Apostoliki Diakonia
të Kishës Ortodokse të Greke. “Feja, shpresa e dashuria - në jetën e krishterë
shkojnë krah për krah” ripohoi Benedikti XVI duke iu drejtuar arkimandritëve, priftërinjve
dhe seminaristëve si dhe të gjithë pjesëmarrësve të Kolegjit greko-ortodoks, që ndodhen
në Romë për një vizitë studimi, të shoqëruar nga Peshkopi i Fanarionit, Agathanghelos,
duke uruar që të gjindet konkretisht rruga për t’i kapërcyer ndarjet përmes konvertimit
personal e komunitar e po kështu edhe përmes ushtrimit për ta dëgjuar tjetrin dhe
lutjes për bashkim. Në se në fillim të mijëvjeçarit të dytë ngadhënjyen forcat
e së keqes ndërmjet të krishterëve të Lindjes e të Perëndimit, Papa vuri në dukje
shenja të shumta ngushëlluese që janë dukur gjatë 40-vjetëve të fundit në marrëdhëniet
ndërmjet Kishës katolike e Kishës ortodokse të Greqisë, kurorëzuar nga takimi i Gjon
Palit II me Patrikun Kristodulos, Kryepeshkop i Athinës dhe i mbarë Greqisë, në maj
të vitit 2001, pasuar edhe nga disa veprimtari bashkëpunimi dhe nisma të dobishme
për t’u njohur nga afër e për të favorizuar përgatitjen e të rinjve, siç janë shkëmbimet
e vizitave, bursat e studimit dhe bashkëpunime në fushën e botimeve. E, ndërmjet këtyre
nismave, Papa kujtoi projektet e formimit që po vënë në jetë Kolegji Apostoliki Diakonia
dhe Komiteti Katolik për bashkëpunim kulturor me Kishat ortodokse, nën kujdesin e
Këshillit Papnor për nxitjen e bashkimit të të krishterëve. Jam i sigurtë – deklaroi
Benedikti XVI – se dashuria e anasjelltë do të dijë të na hapë rrugë të reja. Së
fundi, një përshëndetje të posaçme për patrikun Kristodulus: “Zoti – vërejti Benedikti
XVI – do të na tregojë mënyrët e kohët për ta përsëritur takimin tonë në atmosferën
e gëzueshme të vëllazërisë”.