Sot, 26 shkurt e Diela
VIII e Kohës gjatë vitit kishtar, Kisha katolike përkujtoi Shën Faustinianin, ipeshkëv
i Bolonjës. *** Nesër, e hënë, do të kremtojë Shën Gabrielin e Zojës së Dhimbshme,
klerik pasionist, që na fton, në përkim me Ungjillin e ditës, të mos mjaftohemi me
zbatimin e urdhërimeve të Zotit, por t’ia dhurojmë Atij gjithë vetveten. *** Të
martën do të përkujtohet Shën Hilari, papë dhe Shën Romani, abat, që na kujtojnë se
ata që do ta ndjekin me besnikëri Krishtin, do të kenë një shpërblim të shumfishtë.
*** E mërkurja e ardhshme është e Mërkurja e Përhime. Me të fillon Koha kishtare
e Kreshmëve, kohë pendese e agjërimi, që na përgatit shpirtërisht për Pashkët e Ngjalljes.
Në gjithë botën katolike lartohet drejt qiellit lutja: “Falna, o Zot, se kemi mëkatuar!” Përkujtohen
edhe Shën Feliçi III papë e Shën Albini, ipeshkëv i Anzherit. *** Të enjten
do të kremtohet Shën Angjela e Kryqit, virgjër, jeta dhe vdekja e së cilës na kujtojnë
se është vërtetë i lum vetëm ai që shpreson në Zotin. *** Të premten e ardhshme
Kisha katolike do të kremtojë Shën Kunegondën, bashkëshorte e Shën Enrikut, perandor.
Shenjtja na fton të ndjekim gjurmët e saj, që na mësojnë se ditët e agjërimit janë
shenjë e pritjes së Zotit, ditë të cilat Kisha ia kushton përgatitjes për të fituar
shëlbimin, që vjen nga Krishti i vdekur e i ngjallur. *** Të shtunën do të
kremtohet Shën Kazimiri, Pajtor i Lituanisë, që na kujton se Jezusi ka ardhur mes
nesh si mjek i shpirtit e i trupit për t’i thirrur mëkatarët në rrugën e pendesës,
sepse mëkati është sëmundje që duhet shëruar.