Nga veprimtaria javore
e Benediktit XVI dhe Selisë së Shenjtë:
Më 1 mars, të mërkurën e ardhshme
fillojnë Kreshmët me bekimin e hirit. Papa do të kryesojë Liturgjinë Hyjnore të mërkurës
së përhime në Bazilikën e Shën Sabinës në Romë.
Koncistori i parë i papnisë
të Benedikti XVI për krijimin e 15 kardinajve të rinj, do të mblidhet më 24 marsin
e ardhshëm.
Papa Benedikit XVI priti në audiencë në Vatikan Presidentin
e Republikës së Shqipërisë, Alfred Moisiu.
Rubrika javore ‘Shenjtorët e javës’.
Rubrika
muzikore javore kushtuar individualiteteve të shquara të muzikës shqiptare: sot prof.
Spiro Kalemi do të njoftoi me kompozitorin Endri Sina, pjesë për soprano, violonçel
e pianoforte e lajme të tjera. Një pasqyrë e shkurtër javore
e aktiviteteve të Papës e Selisë së Shenjtë:
Më 1 mars, të mërkurën
e ardhshme fillojnë Kreshmët me bekimin e hirit në bazilikën e Shën Sabinës në Romë. Këtë
ditë Papa Benedikti XVI, sipas traditës, do të kryesojë një bashkësi lutjeje në formën
e “Stacioneve romake”, që do të fillojë në Kishën e Shën Anslemit në Aventin, për
të vijuar më pas, me procesion, drejt bazilikës së Shën Sabinës, ku do të kremtohet
Mesha e shoqëruar me ritin e bekimit të hirit e të përhimjes. *** Benedikti
XVI njoftoi se Koncistori i parë i papnisë së tij, për krijimin e 15 kardinajve të
rinj, do të mblidhet më 24 marsin e ardhshëm. Lajmi i pritur u dha të mërkurën
e kaluar, në festën e Katedrës së Pjetrit, gjatë audiencës së përgjithshme mbajtur
në Bazilikën e Vatikanit dhe në sallën e Palit VI. Koncistori do të kremtohet më
24 mars, pasi do të paraprihet, më 23 mars, nga një takim reflektimi e lutjeje që
Papa do ta mbajë me të gjithë Kolegjin kardinalor e do të pasohet, të shtunën, nga
një bashkëkremtim solemn, i kryesuar nga Ati i Shenjtë së bashku me kardinajtë e rinj
të Kishës, që përfaqësojnë vende të ndryshme të botës dhe kryejnë funksione të ndryshme
në shërbim të Popullit të Zotit. Kardinajtë e rinj – siç tha Papa – e pasqyrojnë
mirë universalitetin e Kishës: 8 vijnë nga Evropa, 3 nga kontinenti amerikan, 3 nga
Azia e 1 nga Afrika. Të kremtosh “Katedrën e Shën Pjetrit” – shpjegoi më pas
Benedikti XVI gjatë katekizmit të audiencës së përgjithshme – do të thotë t’i japësh
asaj një domethënie të thellë shpirtërore e të pranosh një shenjë të privilegjuar
të dashurisë së Zotit, Bariut të mirë e të amshuar, i cili dëshiron ta mbledhë mbarë
Kishën e vet e t’i prijë në udhën e shëlbimit. Katedra e Ipeshkvit të Romës përfaqëson
jo vetëm shërbimin e Tij ndaj bashkësisë romake, por misionin e prijësit të mbarë
popullit të Zotit. *** Të premten e kaluar Papa Benedikti XVI priti në audiencë,
në Vatikan, Presidentin e Republikës së Shqipërisë, Zotin Alfred Moisiu. Bisedimi
privat, në gjuhën italiane, zgjati rreth 20 minuta. Më pas Zoti Moisiu kujtoi takimin
e tij me Papën Gjon Pali II, më 2 dhjetor 2002 e të Lumen Nënë Terezë, pasi i dhuroi
Papës një libër me portrete të Rregulltares së lume shqiptare. Dhurata tjetër e Presidentit
ishte figurja e Zojës së Këshillit të Mirë, Pajtores të Shqiptarëve, realizuar me
teknikën e mozaikut. *** “Të jeni ndërtues urash, veprimtarë të paqes”: këtë
u kërkoi Benedikti XVI ipeshkvijve katolikë të Bosnjë-Hercegovinës, të cilët i priti
të premten e kaluar në audiencë, në përfundim të vizitës së tyre ‘ad Limina’. Papa
vuri theksin tek kontributi që mund të japin prelatët për zhvillimin e vendit pas
viteve të luftës. Shenjtëria e Tij i nxiti të gjithë besimtarët dhe njerëzit vullnetmirë
të impenjohen të punojnë për paqen e pajtimin, për të zbutur tensionet ndërmjet etnive,
që vijojnë ta shqetësojnë vendin dhe uroi që të përfundojnë marrëveshjet për mbrojtjen
e të drejtave të mërgimtarëve, pas viteve të tmerrshme të luftës. *** ‘Nuk
jemi akoma në luftë civile, por kur shikojmë masakra si këto të ditëve të fundit,
rreziku nuk duhet nënvleftësuar”. Kështu i komentoi Imzot Shlemon Varduni, ipeshkvi
kaldé-ndihmës i Bagdadit për Agjensinë e Shtypit SIR, tensionet e kohëve të fundit
ndërmjet shiitëve e sunitëve, që patën si pasojë shkatërrimin e xhamisë së lashtë
shiite të Ali al- Hadit në Samarrë dhe raprezaliet gjatë të cilave vdiqën qindra vetë
nga të dyja palët. *** “Deus Caritas est”- “Zoti është dashuri” ndihmon për
të zbuluar kuptimin e jetës: dashurinë. Kështu u shpreh kryeipeshkvi i Bolonjës, Karlo
Kafarra të enjten e kaluar, në një ballafaqim për Enciklikën e Papës Ratzinger me
psikiatrin Vitorino Andreoli, organizuar nga Dioqeza e Romës. Në ballafaqimin,
që u mbajt pranë bazilikës të Shën Gjonit në Lateran, pati pjesëmarrje të madhe dhe
ndjekje me interesim po aq të madh. Reflektimin e dy oratorëve e kryesoi kardinali
Kamilo Ruini i cili, ndërmjet tjerash, theksoi: “Duam të propozojmë përmasat e ndryshme
të enciklikës, në mënyrë që të bëhet sa më i lehtë kuptimi i saj dhe t’i jepet një
shtytje e re punës baritore dioqezane si në drejtim të baritorisë së familjes, që
është e lidhur ngusht me temën e dashurisë, ashtu edhe në drejtim të ungjillëzimit”. Psikiatri
Andreoli analizoi tematikat e enciklikës, parë në këndvështrimin e realitetit të sotëm.
Studiuesi pohoi se njeriu i sotëm ndjehet tepër i vetmuar, e kjo vetmi krijon një
dhimbje të padurueshme, një dramë të rëndë shpirtërore, që mund të kapërcehet vetëm
përmes lidhjeve, ndjenjave, takimit me tjetrin: përmes dashurisë, sepse dashuria është
ilaçi më i mirë si për qytetin tokësor, ashtu edhe për atë qiellor. *** Vatikani
e konsideron mjet të vdekjes ligjin spanjoll mbi riprodhimin. Është një nga ligjet
më të rënda e më agresive në botë, mjet vdekjeje dhe sprapsjeje shkencore. Kështu
e quan agjensia vatikanase Fides, Ligjin mbi teknikat e riprodhimit njerëzor të asistuar,
miratuar nga parlamenti spanjoll. Është fjala për një projekt-ligj, që përmban
një sërë propozimesh, të cilat e cënojnë të drejtën natyrore. Ndërmjet tyre është
edhe lejimi i prodhimit të qenieve njerëzore. Ligji vendos në mënyrë arbitrare kush
meriton të quhet njeri e kush jo, manipulon gjuhën, për të manipuluar ndërgjegjet
dhe drejtësinë; shpreh mendimin e rrezikshëm se arritja e qellimit i përligj mjetet
dhe nuk përjashton asnjë lloj klonimi njerëzor, për të krijuar kushtet e përdorimit
të klonimit mjekues; arrin deri tek autorizimi për manipulimin arbitrar të jetës,
duke lejuar fekondimin e vezoreve të kafshëve me farë njerëzore, një praktikë me
pasoja të paparashikueshme.