Presidenti i Shqipërisë, Alfred Moisiu vizitoi Bashkësinë Kishtare të Shqiptarëve
pranë Kishës së Shën Gjonit të Mullagave në Romë. Në emër të diaspores shqiptare
të Romës dhe Italisë, Presidentin Moisiu e përshëndeti prifti Arbëresh don Pakuale
Ferraro, përgjegjës për baritorinë e shqiptarëve në Itali.
Përshëndetja e mirëseardhjes drejtuar zotit Alfred Moisiu, President i Repulikës së
Shqipërisë, në Kishën e Shën Gjonit të Mullagave me rastin e vizitës së tij më 23
shkurt 2006 . "I nderuar Shkelqësi, Zoti President, si rektor i kësaj Kishe, kam
nderin dhe kënaqësinë e madhe t’ju uroj mirëseardhjen në emër të mbarë bashkësisë
shqiptare në Romë, bashkësi që sonte mblidhet për të shprehur, rreth personit Tuaj,
dashurinë plot gëzim e dhimbje për Mëmëdheun i cili, ndonëse fare pranë, nganjëherë
për shumë arsye duket i paarritshëm. Shpresa e kthimit dhe dëshira për një integrim
më të mirë në indin italian, janë ndjenjat që i kundërvihen njëra-tjetrës në shpirtin
e emigrantit shqiptar, i cili shpesh herë arrin të gjej ngushëllim e mirëkuptim vetëm
në lutjen vetjake e në atë të bashkësisë. Në këmbët e këtij elteri, që prej një
viti, besimtarët shqiptarë mblidhen për t’u lutur, për të kërkuar e për të gjetur
ndihmë e ngushëllim, duke ndarë së bashku mundimet e gëzimet e tyre e duke ia paraqitur
Zotit me fe të gjallë. E pikërisht për këtë fe, që u ruajt edhe me martirizimin
e popullit në çastet më të errta të historisë, Gjon Pali II na dha një Kishë e cila,
edhe me afërsinë e saj pranë bazilikës së Shën Pjetrit, do të mund të shprehte respektin
e tij personal e të mbarë Kishës katolike për këtë tokë. Sonte, Zoti President,
me vizitën tuaj ndërmjet nesh, ju konfirmoni pritjet dhe entuziazmin që i ushqejmë
ndër zemra çdo ditë për një bashkëpunim më të ngushtë ndërmjet Italisë e tokës sonë
shqiptare. Si arbëresh, i ardhur nga Kalabria, mendoj t’ju shpreh, me praninë
time e me përgjegjësinë si Rektor, vëmendjen e Kishës italo-shqiptare për Shqipërinë. Kisha
e Shën Gjonit të Mullagave, e cila për ne është “Shtëpia e shqiptarëve”, dëshiron
t’ju shprehë me gjeste të thjeshta, por konkrete, ngrohtësinë tonë tradicionale si
dhe t’ju urojë punë të mbarë e të frytshme, për të cilën i lutemi Zotit, mbi të gjitha
për të lehtësuar vuajtjet, braktisjen e varfërinë e për të bërë që fenomeni i emigrimit,
me të cilin ballafaqohemi ditë për ditë në punën tone baritore, të mos jetë më shprehje
e vështirësive ekonomike, por e nevojës të shkëmbimit kulturor, të gëzimit e të vëllazërimit
e njëkohësisht, edhe symbol i pasurisë së popujve, siç ka qenë gjithnjë në histori. Zoti
na dhëntë të gjithëve forcën për ta shikuar me frymën e paqes e të dashurisë ardhmërinë
e tokës sonë fort të dashur e Juve, ju bekoftë!" Don Paskuale Ferraro