Sipas televizionit
BN të Bosnjës sot pasdite u arrestua në Beograd Ratko Mladiq, ish gjenerali serb i
kërkuar nga gjykata e Hagës për krime lufte dhe mbi të gjitha për genocidin e ushtruar
ndaj banorëve të Srebrenicës. Gjithnjë sipas këtij kanali televiziv Mladiqi në këto
çaste po transferohet drejt Tuzlës prej nga do të shkojë në Hagë për t’i nënshtruar
gjykimit. Sidoqoftë lajmi u përgënjeshtrua nga Sërgjan Gjuriq, zëdhënës i kryeministrit
serb Vojislav Koshtunica.
Në Vjenë përfundoi raundi i parë i bisedimeve
mes Prishtinës dhe Beogradit për të ardhmen e statusit të Kosovës. Në konferencën
për shtyp zëvendëskryenegociatori Rohan tha se raundi i parë ishte sa për paraqitjen
e qëndrimit të të dyja palëve në lidhje me decentralizimin. Takimi i dytë do të mbahet
me 17 mars. Po më hollësisht nga Prishtina të ndjekim shërbimin e Rabie Ibrajt.................2.02”
“Ftesa
që Shqipëria të hyjë në NATO në 2008 është pasaporta më e shkëlqyer e sigurisë, e
së ardhmes, dhe e zhvillimit të këtij vendi” u shpreh kryeministri Berisha gjatë takimit
të grupit ndërministror për integrimin në NATO. Më pas kryeministri tha se qeveria
e tij do të bëjë të tëra përpjekjet dhe do të shfrytëzojë të gjitha mundësitë që të
hyjë në NATO në 2008-ën.
Presidenti palestinez Abu Mazen ngarkoi sot zyrtarisht
Ismail Hanijehun, përfaqësues të Hamasit të formojë qeverinë e re. Sipas ligjit kryeministri
i ri ka kohë deri me 14 mars për të paraqitur përbërjen e qeverisë së vet por mundet
edhe të kërkojë dy javë shtesë.
Kryeministri i Pakistanit Shaukat Aziz
i kërkoi Konferencës Islamike që të mblidhet urgjentisht pas revoltave të dhunshme
kundër karikaturave të Muhametit, të cilat vijojnë të shkaktojnë viktima. “Islami
është fe paqësore. Dënojmë dhe distancohemi nga dhuna e shprehur gjatë demonstrimeve”
deklaroi kryeministri i Pakistanit.