У Беларусi адзначылі 260-ю гадавiну з дня славутага сына нашай зямлi — Тадэвуша
Касцюшкі, нацыянальнага героя ЗША і Польшчы, ганаровага грамадзяніна Францыі.
Памяць аб Андрэi Тадэвушы Банавентуры Касцюшке (гэта поўнае iмя нашага земляка, нададзенае
яму пад час хросту) вырашылi ўшанаваць акрэдытаваныя ў Беларусi дыпламаты з розных
краінаў, а таксама прадстаўнікі мясцовай грамадскасці. Пасол ЗША ў Беларусі Джордж
Крол наведаў вёску Малыя Сяхновічы, дзе знаходзіцца пакуль адзіны на ўсю Беларусь
помнік Касцюшку. У мясцовай школе амерыканскі дыпламат агледзеў экспазіцыю невялікага
музея. У Жабінкаўскім раёне спадар Крол, разам з дэлегацыяй нацыянальнай вайсковай
акадэміі з амерыканскага горада Уэст-Пойнт ушанаваў памяць загінуўшых пад час паўстання
1794 года, якіх узначальваў Тадэвуш Касцюшка. Галоўная ж ўрачыстасць адбылася ў
былым радавым фальварку Касцюшкаў Мерачоўшчына, што ў Івацэвіцкім раёне, якi быў
нядаўна адрэстаўраваны пры матэрыяльнай дапамозе ЗША. Нажаль у тутэйшым музэi
пакуль яшчэ вельмi мала экспанатаў. Таму адмiнiстрацыя музэя з падзякай прыняла ад
амерыканскiх гасцей фрагменты фартыфікацыйных забудоў, узведзеных у ЗША пад кіраўніцтвам
Тадэвуша Касцюшкі. Госцi прывезлi таксама ў падарунак супрацоўнiкам музэя сучаснае
камп’ютэрнае абсталяванне. Са свайго боку, часовы павераны ў справах Рэспублiкi
Польшча ў Беларусі спадар Аляксандр Васілеўскі заявiў, што ягоная краiна возьме ўдзел
у праектаванні і пабудове помніку Тадэвушу Касцюшку ў ягоных родных мясцінах.