Në Adelaide të Australisë kremtimet e Ditës së 14-të Botërore të të sëmurit.
Do të arrijnë kulmin më 11 shkurt, ditën e kujtimit liturgjik të Zojës Lurdë. Mesha
e hapjes, që do të kryesohet nga kryeipeshkvi i Adelaides, imzot Filip Uillson, do
të pasohet nga ligjërata e hapjes e të Dërguarit të posaçëm të Papës, kardinalit Havier
Lozano Barragan, kryetar i Këshillit Papnor për baritorinë e shëndetit. Kremtimet
e këtij viti i kushtohen temës të sëmundjeve mendore. Benedikti XVI, i cili jep me
këtë rast ndjesën e plotë, në mesazhin e tij për këtë Ditë, nxit në mënyrë të veçantë
për të ndihmuar ata që vuajnë nga probleme lidhur me sëmundjet mendore. Mbi këtë nxitje
të Papës, të dëgjojmë kardinalin Lozano Barragan, në mikrofonin e radios sonë: ***
- Po, mendoj se tërheq vëmendjen në radhë të parë mbi numrin e madh të
njerëzve me të meta mendore në botë: 450 milion vetë. Pastaj na kujton edhe sëmundje
të tjera të tmerrshme, por ndërmjet tyre, sëmundja mendore e bën njeriun të vuajë
në thellësi të shpirtit, të qenies së tij. Për një njeri të tillë duhet të tregojmë
gjithë vëmendjen tonë, siç thotë edhe Papa, duke u përpjekur ta shoqërojmë e ta shërojmë. *** -
Në shumë vende, nënvizon Papa në mesazh, nuk ka endè ligje në këtë drejtim, ndër të
tjera mungon një politikë që ka të bëjë me shëndetin mendor. Veç tjerash, thotë gjithnjë
Papa, në shumë vende të botës, shërbimet për këta të sëmurë mungojnë, janë të pamjaftueshme
ose në shpërbërje e sipër…. ***
Është fakt që vetëm 25%
e vendeve kanë ligje të përshtatshme në këtë drejtim, e pastaj duhet parë në se
zbatohen apo jo. Ajo që shikojmë, janë të varfërit me të meta mendore, që enden, si
të pastrehë, ndër sheshet e qyteteve. Mendoj, prandaj, se ka ardhur koha të rishikohen
këto ligje. Jemi kundër braktisjes të të sëmurëve, që lihen në fatin e vet ose që
jetojnë në familje, duke krijuar probleme të rënda, të cilat familja nuk është në
gjendje, nuk po themi t’i durojë, por t’i mjekojë; e nuk duhet të harrojmë se të sëmurët
mendorë nganjëherë janë edhe të rrezikshëm. Disa thonë se, kur paraqesin rrezik, policia
duhet t’i mbyllë në burg. Po kjo është e pamundur. Një nënë nuk mund ta trajtojë kështu
të birin a të bijën që është në këtë gjendje. Nuk mund ta bëjë. E atëherë duhet treguar
një kujdes i veçantë për ta.