Në Kandahar në jug të Afganistanit u krye një sulm i ri me bomba kundër shtabit të
përgjithshëm të policisë afgane. Talebanët të cilët deri në mbarimin e luftës kishin
qendrën drejtuese në këtë qytet morën përsipër përgjegjësinë e atentatit si pasojë
e të cilit u vranë 13 vetë.
Dhuna vijon edhe në Irak. Në dy atentate në
qendër të Bagdadit vdiqën 7 persona. Bomba e parë shpërtheu në afërsi të një tregu.
Turma e njerzëve që rendi për të parë ç’kishte ndodhur u godit nga një bombë e dytë.
Sidoqoftë, në të gjithë vendin po rriten masat e sigurisë në kuadër të festës së Hashures
që do të kremtohet të enjten nga besimtarët shiitë.
“Kryeministri i ri
palestinez do të jetë një përfaqësues i Hamasit ndërsa Al Fatahut do t’i propozojmë
që të martrë pjesë në qeveri.” Kështu deklaroi një nga udhëheqësit e Hamasit, partisë
fondamentaliste palestineze që fitoi zgjedhjet e 25 Janarit. Bisedimet për formimin
e qeverisë së re palestineze po zhvillohen në Egjipt. Ndërkaq bëhet e ditur se ushtria
izraelite vrau në Nablus një nga kryetarët e brigadave terroriste Al Kuds.
Hezbollahu
libanez arriti një marrëveshje politike me partinë e ish gjeneralit Mishel Aun që
hedh bazat për të ardhmen e Libanit. Hezbollahu është një lëvizje islamike që gjatë
luftës civile mbështetej nga Irani dhe Siria, ndërsa gjenerali Aun është i krishterë
dhe ka luftuar gjithnjë kundër ndërhyrjeve siriane.
Kryesia e Kuvendit
të Kosovës vendosi që zgjedhja e presidentit të ardhshëm të bëhet me 13 shkurt. Lidhja
Demokratike e Kosovës paraqiti si kandidat të sajin z. Fatmir Sejdiu. Në fjalën e
vet z.Sejdiu tha se do të punojë me ngulm për të realizuar deri në fund idealin e
Ibrahim Rugovës për një Kosovë të pavarur, të lirë, demokratike e të integruar në
Evropë. Për kandidaturën e Fatmir Sejdiut shprehu kënaqësi edhe kryeministri shqiptar
z.Sali Berisha.
Vdiq në Milano, piktori i mirënjohur shqiptar Ibrahim Kodra.
Kishte lindur me 22 prill 1918 në Ishëm të Durrësit. Në vitin 1938 fitoi një bursë
studimi për arte të bukura dhe u largua për në Itali. Ekspozitën e parë e hapi në
Milano në vitin 1944. Më vonë punimet e tij u ekspozuan krahas atyre të Pablo Pikasos,
Matis, Modiljanit, Dali e tjerëve. Disa nga veprat e Ibrahim Kodrës gjinden edhe në
muzeumet e Vatikanit. Vendi që e lindi i ka dhënë Ibrahim Kodrës titullin e lartë
“Nderi i Kombit”.