Deklaratë e Sallës së Shtypit të Selisë së Shenjtë lidhur me ngjarjen e karikaturave
satirike mbi Muhametin,
Salla e Shtypit e Selisë së Shenjtë publikoi, një Deklaratë, në të cilën nënvizohet
se bashkëjetesa njerëzore kërkon një klimë respekti të anasjelltë për të favorizuar
paqen ndërmjet njerëzve dhe kombeve. E drejta e lirisë së shprehjes – lexohet në
Dokument – nuk mund të përdoret për të fyer ndjenjën fetare të besimtarëve. Në një
botë që dëshiron ta zhdukë shuplakën e intolerancës, mirëkuptimi dhe respekti i anasjelltë
bëhen shtylla të pazevendësueshme. Por ja ç’shkruhet konkretisht në Deklaratën
e Sallës së Shtypit të Selisë së Shenjtë: Për t’iu përgjigjur kërkesave të
ndryshme lidhur me saktësimin e qëndrimit të Selisë së Shenjtë përballë shfaqjeve
fyese ndaj ndjenjave fetare të individëve ose të bashkësive të tëra, vërejtur kohëve
të fundit, Salla e Shtypit e Selisë së Shenjtë deklaron: E drejta e lirisë
së mendimit dhe të shprehjes, e sanksionuar nga Deklarata e të Drejtave të Njeriut,
nuk mund të përfshijë të drejtën për të fyer ndjenjën fetare të besimtarëve. Një parim
i tillë vlen pa dyshim për të gjitha besimet.
Bashkëjetesa
njerëzore kërkon, pastaj, një atmosferë respekti të anasjelltë, për të favorizuar
paqen ndërmjet njerëzve dhe Kombeve. Përveç tjerash, forma të tilla kritike acaruese
ose që vënë në lojë të tjerët, dëshmojnë për mungesë ndjeshmërie njerëzore e mund
të shkaktojnë, në disa raste, një provokim të papranueshëm. Leximi i historisë na
mëson se plagët ekzistuese në jetën e popujve nuk mund të shërohen duke ndjekur një
rrugë të tillë.
3. Por duhet thënë menjëherë edhe se për fyerjet
e shkaktuara nga një njeri i vetëm ose nga një organ shtypi, nuk mund të fajësohen
institucionet publike të mbarë vendit, autoritetet e të cilit mund e duhet të ndërhyjnë
sipas parimeve të ligjshmërisë kombëtare. Veprimet e dhunshme të protestës janë njëlloj
të dënueshme. Për të reaguar kundër fyerjes, nuk mund të harrohet fryma e vërtetë
e një feje. Intoleranca reale ose verbale, nga cilado anë që të vijë, si veprim ose
si kundërveprim, përbën përherë një kërcënim serioz për paqen” – përfundon Deklarata
e Sallës së Shtypit të Selisë së Shenjtë.