Konferenca e shtypit per paraqitjen e Enciklikes se pare te Benediktit XVI.
Me 25 janar 2006, në sallën e Shtypit të Selisë së Shenjtë, u mbajt Konferenca
e Shtypit për paraqitjen e Enciklikës së parë të Benediktit XVI. Në paraqitjen e ‘Deus
Caritas est’ folën kardinali Renato Raffaele Martino, kryetar i Këshillit Papnor për
Drejtësinë dhe Paqen, kryeipeshkvi William Joseph Levada, prefekt i Kongregatës për
Doktrinën e fesë dhe kryeipeshkvi Paul Josep Cordes, kryetar i Këshillit Papnor ‘Cor
Unum’. ‘Një reflektim i thellë dhe ndriçues mbi dashurinë e krishterë’ – kështu
e quajti kardinali Martino Enciklikën e parë të Benediktit XVI, duke vënë posaçërisht
në dukje se në të përballohet problemi i mprehtë i aktivizmit shoqëror e bamirës pa
shpirt, gjë që duhet t’i nxitë të gjithë të kultivojnë arsyet dhe motivacionet shpirtërore
që e dallojnë Kishën e të krishterin e që i japin kuptim e vlerë çdo veprimtarie. Kryeipeshkvi
Levada ripohoi se ‘Deus Caritas est’ është një tekst i fortë, që i kundërvihet përdorimit
të gabuar të emrit të Zotit dhe dykuptimësisë të nocionit të dashurisë në botën e
sotme. Papa vë në dukje se dy konceptet nuk i kundërvihen njëri-tjetrit, por harmonizohen,
për të ofruar një konceptim realist të dashurisë njerëzore, dashuri që përkon me tërësinë
e vetë njeriut”. E së fundi, Kryeipeshkvi Cordes, kryetar i Këshillit Papnor Cor
Unum, nënvizoi se ky dokument i Papës është shumë i rëndësishëm për dikasterin që
kryeson e se është enciklika e parë kushtuar bamirësisë. Zëdhënësi i Selisë së
Shenjtë, Navarro Valls deklaroi se “Deus Caritas est” ka nisur të shkruhet në Castel
Gandolfo verën e kaluar, pas pushimeve të Benediktit XVI në Valle d’Aosta dhe është
nënshkruar më 25 dhjetorin e kaluar. Pas kësaj date ka kaluar një muaj, gjatë të cilit
është përgatitur përkthimi në gjuhë të ndryshme.