Letra e Papës drejtuar lëxuesve të revistes italiane 'Familja e krishtërë'.
Letra e Papës Benedikti XVI drejtuar lexuesve të revistës italiane “Familja e krishterë”
për të paraqitur Enciklikën “Deus Caritas est” i bashkëngjitet numrit të saj të sotëm. “Të
dashura lexuese e lexues të Familjes së krishterë”: kështu e nis Benedikti XVI letrën,
publikuar sot nga revista e rregulltarëve të Shën Palit, përmes të cilës Papa paraqet
Enciklikën e tij të parë “Deus Caritas est”, e cila i bashkëngjitet numrit të sotëm. *** Papa
shpjegon se teksti i enciklikës në fillim mund të duket pak i vështirë e teorik. Por
duke vijuar leximin, duket qartë se dokumenti ka për qëllim t’u përgjigjet disa pyetjeve
shumë konkrete për jetën e krishterë. Pika e parë – shkruan Papa – është se Zotin
mund ta duam me të vërtetë, sepse ai vetë na është afruar, madje ka hyrë në jetën
e secilit nga ne: me sakramentet, me Kishën, duke na bërë të takojmë njerëz që përçojnë
dritën e tij. Dashuria nuk është vetëm ndjenjë, por përfshin edhe vullnetin e intelektin,
në mënyrë që të mësohemi ta duam Zotin me gjithë zemër e me gjithë shpirt: *** “Dashurinë…
nuk e gjejmë të bukur e të gatshme, ajo rritet; mund ta mësojmë, si të thuash, dalëngadalë,
në mënyrë që ajo gjithnjë më tepër të pushtojë të gjitha forcat tona e të na hapë
rrugën për një jetë të drejtë”. *** Pika e dytë – shkruan Papa –
është se mund ta duam të afërmin edhe në se mund të jetë i huaj për ne, madje edhe
antipatik. Mund ta duam, në se jemi miq të Jezusit: *** “Në se … miqësia
e Tij pak nga pak bëhet për ne e rëndësishme dhe e gjallë, atëherë do të fillojmë
t’i duam mirë të gjithë ata që i do Ai dhe që kanë nevojë për ndihmën time. Ai dëshiron
që ne të bëhemi miqtë e miqve të tij e ne mund ta bëjmë këtë, në se jemi shpirtërisht
pranë Tij”. *** Më pas Papa shpjegon se feja të prin drejt gëzimit
të plotë: nuk është aspak e vërtetë se Kisha, me urdhërimet e veta, na e bën të hidhur
gëzimin e erosit, të të dashuruarit: *** “Në Enciklikë Papa kërkon të tregojë
se premtimi më i thellë i erosit mund të fitojë pjekurinë e vet vetëm kur nuk përpiqemi
të kapemi pas lumturisë së menjëhershme. Përkundrazi duhet pasur durim për ta zbuluar
tjetrin në thellësi, në tërësinë e korpit e të shpirtit, në mënyrë që më në fund lumturia
e tjetrit të bëhet më e rëndësishme se imja. Atëherë nuk dëshiron më vetëm të marrësh,
por të dhurosh e pikërisht në këtë çlirim nga vetvetja, njeriu gjen vetveten e mbushet
plot me gëzim”. *** Së fundi Benedikti XVI kujton lidhjen ndërmjet
drejtësisë dhe bamirësisë, duke theksuar se Kisha nuk mund të heqë dorë nga shërbimi
bamirës. Shenjtëria e Tij u kujton të krishterëve të impenjuar në profesione publike
se u takon që në veprimtarinë e tyre politike t’i hapin gjithnjë rrugë të reja drejtësisë,
në mënyrë që askush të mos vuaj nga mjerimi. E në se për vetë natyrën e vet Kisha
nuk bën politikë drejtpëdrejtë, duke respektuar autonominë e shtetit, nga ana tjetër
merr pjesë me pasion në betejën për drejtësinë, duke çuar dritën e fesë atje ku arsyja
është e verbuar nga interesi e nga etja për pushtet. Por ajo që Papa e ka më për zemër,
është të pohojë se drejtësia nuk mund ta bëjë kurrë të tepërt dashurinë: ***“Përtej
drejtësisë, njeriu do të ketë gjithnjë nevojë për dashurinë, e vetmja që i jep shpirt
drejtësisë. E kjo që thamë duket qartë në një botë kaq të plagosur si kjo e ditëve
tona. Bota pret dëshminë e dashurisë së krishterë që na frymëzohet nga feja. Në botën
tonë, shpesh herë tepër të errët, përmes kësaj dashurie vezullon drita e Hyjit’.