Ֆրանչիսկոս Պապ. Պօղոս Զ այս տարի կը սրբադասուի։

(Ռատիօ Վատիկան) Անցեալ հինգշաբթի 15 փետրուարին, Հռոմի թեմի ժողովրդապետներու հետ ունեցած հանդիպումի ընթացքին, Ֆրանչիսկոս Սրբազան Քահանայապետը հաստատած է թէ «Պօղոս Զ Քահանայապետը այս տարի սուրբ կը հռչակուի»։

Ան իր խօսքին մէջ նշած է թէ Հռոմի երկու եպիսկոպոսներ արդէն սուրբ են՝ Յովհանէս  ՒԳ եւ Յովհաննէս Պօղոս Բ. Պօղոս Զ սուրբ կը հռչակուի այս տարի, մինչ Յովհաննէս Պօղոս Ա քահանայապետի սրբադասման դատը տակաւին կը շարունակուի։

Պօղոս Զ երանացման սուրբ պատարագի ընթացքին՝ 19 հոկտեմբեր 2014-ին, Ֆրանչիսկոս Պապ զինք որակած էր «մեծ քահանայապետ» եւ «անխոնջ առաքեալ» ինչպէս նաեւ քաջ քահանայապետ իր «Քրիստոսի ու Եկեղեցւոյ նկատմամբ սիրոյ՝ հեզ եւ մարգարէական վկայութեամբ»։