Thirrjet e Papës Françesku në kërkim të vërtetësisë së informacionit

Pritet nesër, publikimi i Mesazhit të Papës Françesku për Ditën e 52-të Botërore të Komunikimeve Shoqërore, me temë: “E vërteta do t’ju bëjë të lirë. Lajmet e rreme dhe gazetaria e paqes”. Ati i Shenjtë është ndalur disa herë mbi temën e vërtetësisë së informacionit, duke filluar që nga fjala për veprimtarët e mediave, tri ditë pas zgjedhjes në Katedrën e Shën Pjetrit. Në atë rast, më 16 mars 2013, Françesku u kujtonte gazetarëve se profesioni i tyre “kërkon një vëmendje të veçantë ndaj së vërtetës”.

Dizinformimi është “mëkati i mediave”

Një vit më vonë, më 22 mars 2014, duke u takuar me anëtarët e shoqatës së gazetarëve “Corallo” (Korali), Papa vinte në dukje tre mëkate të mediave: “dizinformimi, shpifja dhe përgojimi”. Dizinformimi, paralajmëron Ati i Shenjtë, “i thotë gjërat përgjysëm, zgjedh ato lajme që leverdisin, duke mos e thënë gjysmën tjetër. E kështu, ata që shohin televizionin, ose dëgjojnë radion, nuk mund të gjykojnë si duhet, sepse nuk i kanë elementet”. Mbi binomin vërtetësi e gazetari, Papa flet sërish pak muaj më vonë, kur më 15 dhjetor 2014, takon punonjësit e televizionit katolik italian Tv2000. Dizinformimi, nënvizon me atë rast, “nuk të jep mundësinë ta gjykosh saktë realitetin”. E vëren se “komunikimi i vërtetë nuk shqetësohet aspak” të bëjë zhurmë e bujë, sepse kur përpiqet vetëm për këtë, “nuk është shërbim i mirë” për njerëzit. “Të shmangen parrullat – bën thirrje Papa –informacioni të jetë në shërbim të njerëzve”.

Gazetarët ta duan të vërtetën, mediat të jenë transparente

Në fjalën e mbajtur para Këshillit kombëtar të Urdhërit të Gazetarëve italianë, më 22 shtator 2016, Papa i kthehet temës qendrore të së vërtetës. “Ta duash të vërtetën – nënvizon Françesku – do të thotë jo vetëm ta pohosh atë, por edhe ta jetosh, ta dëshmosh me punën tënde”. Pra, duhet të jetojmë e të punojmë, duke qenë “koherentë me fjalët, që përdorim për artikullin e gazetës, ose për shërbimin televiziv”. Edhe në intervistën për të përjavshmen belge “Tertio”, më 7 dhjetor 2016, Ati i Shenjtë thekson se dizinformimi “mund t’i bëjë shumë dëm mjeteve të komunikimit… Ai është, ndoshta, dëmi më i madh, sepse e orienton opinionin në një drejtim të caktuar, duke lënë mënjanë pjesën tjetër të së vërtetës”. E pastaj, Papa pohon me forcë se mediat duhet të jenë të qarta, transparente.

“Jo” sensacionalizmit, kultivoni mendimin kritik të lexuesve

Pak javë më parë, më 16 dhjetor 2017, duke u folur anëtarëve të Bashkimit të Shtypit Periodik Italian dhe Federatës Italiane të të Përjavshmeve Katolike, Ati i Shenjtë vë në dukje dëmet, që mund t’i sjellë informacionit, “shqetësimi për shpejtësinë” e dhënies së lajmit, si edhe “nxitja për sensacionalizëm”. “Nevojitet – ngre zërin Papa – një informacion i besueshëm, me të dhëna e lajme të verifikueshme, që nuk synon të habisë apo të emocionojë, por të zhvillojë tek lexuesit mendimin e shëndoshë kritik”. Vetëm kështu, nënvizon Ati i Shenjtë, “nuk do të jemi vazhdimisht në mëshirën e parrullave apo të fushatave të veçanta, që shihet qartë se synojnë ta manipulojnë realitetin, opinionet dhe vetë njerëzit, duke ngritur më kot pluhur mediatik”.