Հայաստանի Հանրապետութեան վարչապետ Կարէն Կարապետեան շնորհաւորական ուղերձ յղած է Ամանորի եւ Ս. Ծննդեան տօներուն առիթով: Ուղերձին մէջ մասնաւորաբար կը նշուի.
«Պատիւ եւ հնարաւորութիւն ունեմ դիմել ձեզ Նոր տարուայ եւ Սուրբ ծնունդի շնորհաւորանքներով: Ցանկանում եմ ձեր ընտանիքներում տարին լինի երջանիկ, ջերմ, սիրով եւ համերաշխութեամբ լի:
Ինչպէս ընդունուած է` նոր տարի մտնելիս ամփոփում ենք անցնող տարին: Տնտեսութիւնը բնութագրող տարեկան արդիւնքները լինելու են աւելի լաւը, քան նախատեսել էինք 2016 թուականին եւ դրական տարբերուող` տարածաշրջանի շատ երկրներից: Երկրի առջեւ կանգնած բոլոր խնդիրները լուծելու համար մենք պէտք է տարին տարուայ վրայ ամէն օր քրտնաջան աշխատենք եւ կայուն աճ ապահովենք:
Ոչ մէկը մեր երկիրը չի զարգացնելու եւ չի կառուցելու մեր փոխարէն:
Հայաստանը կը լինի տրամաբանական, լաւ ապրող եւ ապագային վստահ նայող երկիր: Մեզ անհրաժեշտ է երկրում հանդուրժողականութեան մթնոլորտի ապահովում, փոխադարձ յարգանք եւ երկիրը զարգացնելու նպատակի շուրջ համախմբում: Իւրաքանչիւրս կարող է մաս կազմել այդ համախմբմանը: Երկիրը պաշտպանող, աշխատող, սովորող, շուտ արթնացող, իր, շրջապատի, երկրի նկատմամբ անհանգիստ, պրպտող մարդը պէտք է զգայ իր պահանջուածութիւնը:
Մենք կարո՛ղ ենք միասին զարգացնել մեր երկիրը եւ արդիւնքում ունենալ ուժե՛ղ, արդա՛ր, զարգացա՛ծ, բարեկեցիկ երկիր` աճող եւ երջանիկ բնակչութեամբ:
Սիրելի՛ հայրենակիցներ,
Այս տօնական օրերին հոգատարութեամբ լցրէք ձեր օճախները, գրկէք ձեր ծնողներին եւ մեծերին, երեխաներին եւ թոռնիկներին, միմեանց բարի խօսքեր ասէք, ուրախացէք, ներէք: Ձեր ընտանիքի անդամների, բարեկամների, ընկերների հետ կտրուէք առօրեայ հոգսերից եւ դրական լիցքերով տրամադրուէք գալիք տարուան:
Վստա՛հ եղէք, մենք ունենալու ենք չտեսնուա՛ծ լաւ երկիր:
Շնորհաւորում եմ ձեր Նոր տարին եւ Սուրբ ծնունդը»:
All the contents on this site are copyrighted ©. |