(Ռատիօ Վատիկան) Յիսուսի Սուրբ Ծննդեան տօնին առիթով, Քաղդէացիներու Լուիս Սաքօ Պատրիարքը յղած է պատգամ մը, որուն մէջ Իրաքի քրիստոնեաները հրաւիրած է աջակցութիւն ցուցաբերելու Պաղեստինցի ժողովուրդին, որ 70 տարիէ ի վեր կը տառապի «անարդարութիւններուն եւ տեղահանութեան պատճառաւ» -յայտնած է Ան, ապա խնդրած է աղօթել Երուսաղէմին համար. որպէսզին անիկա միշտ Սուրբ երկիր մնայ ըլլայ Քրիստոնեաներուն, ըլլայ մահմետականներուն եւ ըլլայ Հրէաներուն համար:
Պատրիարքը ապա անդրադարձած է Իրաք երկրին, որ դեռ նոր ձերբազատուած է Մահմետական ծայրայեղ խմբաւորումներու սպռնաիքներէն, մաղթելով որ շուտով վերանորոգուին մարդոց բնակարաններն ու քաղաքները, այս մէկը նկատելով դիմագրաւելիք մեծ մարտահրաւէր մը որ պէտք է յաղթահարել, հասնելու համար նոր փուլի մը՝ հիմնուած հիմնական սկզբունքներուն վրայ:
Պատրիարքը Ծննդեան իր պատգամին մէջ յիշելով անցեալին՝ ծայրայեղ մահմետականներու կողմէ Քրիստոնեաներուն դէմ կատարուած հալածանքներն ու սպառնանքները, դիտել տուած է որ այս մէկը պատճառ դարձաւ Իրաքի մէջ քրիստոնեաներուն թիւին նուազեցման ու այս առնչութեամբ կոչ ուղղած է Իրաքի կառավարութան որ աշխատանք տանի որպէսզի « Քրիստոնեաները իրենց երկիրը վերադառնան՛
Ան ապա քաջալերանքի խօսք ուղղած է Իրաքի քրիստոնեաներուն, որպէսզի անոնք միշտ քաջ գտնուին թօթափելով իրենց վրայէն վախերն ու անձկութիւնները ինչպէս նաեւ իրենց անձնական շահերը , որոնք անցեալին մէջ պատճառած են անթիւ բաժանումներ։
Պատրիարքը ապա առաջնահերթ նկատեց անեըալին հարցերը լուծել խաղաղութեամբ եւ երկխօսութեան միջոցաւ, յատկապէս Քրտական մարզի հարցերը եւ ի վերջոյ խօսքը ուղղելով Իրաքի եկեղեցւոյ, խնդրեց կարդալ ժամանակին նշանները եւ ընդառաջել Ֆրանչիսկոս Պապին խնդրանքներուն ու յորդորներուն ուղղուած քրիստոնեաներուն, այն է «ներթափանցել հոգեւոր իրողութեան մէջ հրաժարելով իշխանութեան ու դրամի ձգտումէն»:
All the contents on this site are copyrighted ©. |