“Çdo i huaj, që troket në portën tonë, është rast takimi me Jezu Krishtin!”. Ky, tweet-i i botuar sot nga Papa Françesku në faqen e tij Twitter@Pontifex, lexuar nga 43 milionë ndjekës, në 9 gjuhë.
Më 14 janar, Mesha e Papës në Shën Pjetër me emigrantët
Fjalët e Papës nënvizojnë rëndësinë e Ditës së sotme Ndërkombëtare të Emigrantit, organizuar nga Kombet e Bashkuara. Françesku merret, kështu, edhe një herë, me temën tejet të dashur për të, të cilën do ta nënvizojë me forcë në Meshën e 14 janarit të ardhshëm, në Bazilikën e Shën Pjetrit, me rastin e Ditës Botërore të Emigrantit e të Refugjatit. Dita, që kremtohet nga Kisha katolike, përqendrohet tek tema: “Të mirëpriten, të promovohen e të integrohen emigrantë e refugjatët”.
Sekretari i përgjithshëm i OKB-së: të luftohet armiqësia kundër emigrantëve
Për këtë Ditë u botua edhe mesazhi i sekretarit të përgjithshëm të Kombeve të Bashkuara, Antonio Guterres, që vë theksin mbi kontributin dhënë 280 milionë njerëzve, që jetojnë sot në kushtet e emigrantit, Guterres denoncon armiqësinë në rritje, në shumë vise të botës, kundër emigrantëve dhe kërkon solidaritet për ata, që ikin nga toka e tyre për shkak të luftës e të varfërisë. Sekretari i përgjithshëm i OKB-së u kërkon, në përfundim, liderëve botërorë, të punojnë për vazhdimësinë e Marrëveshjeve Global Compact për emigrantët e t’u sigurohet respektimi i të drejtave njerëzore.
Angazhimi i misionareve skalabriniane për emigrantët
Nga ana e tyre misionaret skalabriniane - të angazhuara gjithnjë në strehimin e emigrantëve - deshën ta theksojnë domethënien e kësaj Dite. “Çdo 18 dhjetor - pohon një notë e Motër Neusa de Fatima Mariano, eprore e përgjithshme e Motrave misionare Skalabriniane, është për ne ditë reflektimi. E kjo, para së gjithash, sepse çdo njeri, në mënyrën e vet, është emigrant: për shkak të luftës, të krizës, thatësirës, punës, ambientit, dashurisë për jetën, kërkimit të një jete më të mirë e më të sigurt”.
“Sivjet - vijon komunikata - përkujtohet 20-vjetori i Lumnimit të themeluesit tonë, Giovanni Battista Scalabrini. Ai, atë i emigrantëve, i asistoi përherë me zemër, me mendje e me fe të gjithë ata, që emigronin për të kërkuar kushte më të mira jetese”. Mbrojti - vijon nota - të drejtat themelore të njeriut, duke sensibilizuar e duke propozuar elementet themelore të doktrinës së tij shoqërore, si vënia e njeriut në qendër të vëmendjes, mbrojtja e të gjitha të drejtave themelore dhe vlerësimi i kulturave në veprimtarinë e ungjillëzimit”.
All the contents on this site are copyrighted ©. |