Разнастайнасць чалавечай сям’і сама па сабе не з’яўляецца прычынай выклікаў для мірнага суіснавання паміж народамі, падкрэсліў Францішак прымаючы даверчыя граматы новых паслоў пры Святым Пасадзе – дыпламатычных прадстаўнікоў Емена, Новай Зеландыі, Свазілэнда, Азербайджана, Чада, Ліхтэнштэйна і Індыі. Спецыяльная аўдыенцыя з гэтай нагоды адбылася 14 снежня 2017 г. у Клементыйскай Зале ватыканскага Апостальскага палаца.
У прамове Святы Айцец звярнуў увагу на адметнасць культурных і рэлігійных традыцый, якая характарызуе гісторыю кожнай з прадстаўленых краін. “Гэта дае мне нагоду, каб падкрэсліць станоўчую і канструктыўную ролю, якую гэта разнастайнасць грае ў сугуччы народа. Міжнародная супольнасць змагаецца з шэрагам сур’ёзных пагроз для ўстойлівасці навакольнага асяроддзя і ў адносінах да сацыяльнай і чалавечай экалогіі ўсёй планеты”, - сказаў ён.
Францішак удакладніў, што гаворка ідзе пра пагрозы для міру і згоды, выкліканыя “гвалтоўнымі фундаменталісцкімі ідэалогіямі і рэгіянальнымі канфліктамі”. “Важна памятаць, што разнастайнасць чалавечай сям’і сама па сабе не з’яўляецца прычынай гэтых выклікаў для мірнага суіснавання. Насамрэч, цэнтрабежных сіл, якія імкнуцца падзяліць народы, не трэба шукаць у адметнасцях паміж імі, але ў краху абрання шляху дыялога і разумення, як самага эфектыўнага адказу на гэтыя выклікі”, - перакананы Святы Айцец.
Папа нагадаў дыпламатам, што дыялог дазваляе культурным і рэлігійным адметнасцям стаць сапраўдным здабыткам у сучасным глабалізаваным свеце. “Паважлівая камунікацыя вядзе да супрацоўніцтва, асабліва ў спрыянні прымірэнню, дзе яно найбольш патрэбнае. Такое супрацоўніцтва, у сваю чаргу, гэта дапамога той салідарнасці, якая з’яўляецца ўмовай для пашырэння справядлівасці і належнай павагі да годнасці, правоў і памкненняў усіх. Намаганні на карысць дыялогу і супрацоўніцтва павінны быць адметным знакам кожнай структуры міжнароднай супольнасці, а таксама кожнай нацыянальнай і мясцовай структуры, ад таго моманту, калі яны возьмуць на сябе абавязак пошуку супольнага дабра”, - дадаў Папа.
Францішак нагадаў аб важнасці навучання моладзі дыялогу, прымірэнню і супрацоўнітву. “Перадача гэтай каштоўнай спадчыны нашым дзецям і ўнукам, не толькі забяспечыць мірную і квітнеючую будучыню, але задаволіць таксама патрэбу ў справядлівасці паміж пакаленнямі і тым інтэгральным чалавечым развіцці, на якое мае права кожны мужчына, жанчына і дзіця”, - сказаў Папа.
Апостальская Сталіца падтрымлівае дыпламатычныя адносіны з 183 краінамі свету, а таксама з шэрагам міжнародных арганізацый, у тым ліку: Еўрапейскім Саюзам, Суверэнным Вайсковым Мальтыйскім Ордэнам, Арганізацыяй Вызвалення Палестыны; прымае ўдзел у розных міжнародных праграмах і працы міжурадавых структур.
All the contents on this site are copyrighted ©. |