Në emisionin tonë të së enjtes, në të cilin kemi nisur një cikël me 10
këshilla të Papës Françesku për të rinjtë, sot do të përqendrohemi në ftesën
e Atit të Shenjtë, që i kërkon rinisë të mos mjaftohet me një jetë të zakonshme,
të mos jetojë e aq, pa i hapur vetes horizonte të reja e pa luftuar për idetë personale.
Gjatë Jubileut të jashtëzakonshëm të Mëshirës për të rinjtë e të rejat, më 24 prill
2016, Papa kremtoi meshën, gjatë së cilës tha:
“Liri nuk do
të thotë të bësh gjithmonë atë, që të thotë mendja: kjo na bën të mbyllur, të largët,
na pengon të jemi miq të hapur e të sinqertë; nuk është e vërtetë se kur unë jam mirë,
gjithçka shkon mirë. Jo, nuk është e vërtetë. Liria është dhuratë, që të jep mundësi
të zgjedhësh të mirën: kjo është liria! Është i lirë ai, që e zgjedh të mirën, që
kërkon çfarë i pëlqen Zotit, pavarësisht se kjo është e lodhshme e aspak e lehtë.
Por, unë besoj se ju nuk keni frikë nga mundimet, jeni të guximshëm! Vetëm me vendime
të guximshme e të fuqishme realizohen ëndërrat më të mëdha, ato, për të cilat ia vlen
të jetosh.
Mos u kënaqni
me mediokritetin, me jetën e vakët, duke ndjenjur rehat e ulur; mos u besoni atyre,
që ua largojnë vëmendjen nga pasuria e vërtetë, që jeni ju, duke ju thënë se jeta
është e bukur vetëm nëse keni shumë gjëra; hiquni prej atyre, të cilët duan që ju
të besoni se vleni diçka vetëm kur maskoheni si të fortë, si heronjtë e filmave, ose
kur visheni me rroba të modës së fundit”.