Հարիւր հազարաւորներ Պարսելոնայի մէջ ցոյց կատարեցին Քաթալոնիոյ` Սպանիայէն անջատման դէմ եւ Քաթալոնիոյ վարչապետ Քարլես Փուչտեմոնի բանտարկութիւնը պահանջեցին: Մինչ ցոյցին կազմակերպիչներն ու Մատրիտը յայտնեցին, որ մասնակիցներուն թիւը աւելի քան մէկ միլիոն է, քաթալոնական ոստիկանութիւնը նշեց, որ այդ թիւը 300 հազար է:
Ցուցարարները սպանական դրօշներ բարձրացուցին եւ «Կեցցէ՛ Սպանիան» եւ «Փողոցները բոլորին համար» կարգախօսները բացագանչեցին: Քաթալոնիոյ մեծագոյն ընդդիմադիր կուսակցութիւնը յայտնեց, թէ շրջանի «լռեցուած մեծամասնութիւնը» այժմ իր ձայնը կը բարձրացնէ:
Պելճիքայի գաղթականներու հարցով նախարար Թէօ Ֆրանքեն յայտարարեց, որ Փուչտեմոնի` Պելճիքայի մէջ քաղաքական ապաստան տրուիլը անիրատեսական չէ, եթէ ան այդպիսի պահանջ ներկայացնէ:
Սակայն Քաթալոնիոյ փոխվարչապետը ընդգծեց, որ Քարլես Փուչտեմոն Քաթալոնիոյ ղեկավարն է եւ այդպէս ալ պիտի մնայ:
Սպանիոյ կառավարութեան բանբեր Ինիեկէ Մենտտեզ տէ Վիկօ յայտնեց, որ հակառակ պաշտօնէն հեռացման` Փուչտեմոն քաղաքականութեամբ զբաղիլ շարունակելու իրաւունքը ունի:
«Եթէ Փուչտեմոն մասնակցի այդ (կանխահաս) ընտրութիւններուն, ան կրնայ իր ժողովրդավարական ընդդիմութիւնը կիրարկել», ըսաւ ան:
All the contents on this site are copyrighted ©. |