“Njerëzimi ka mbi krye rrezikun e vetëvrasjes”. Kështu tha Papa Françesku, gjatë
vizitës së tij të sotme në Dikasterin vatikanas për Shërbimin e Zhvillimit të Gjithanshëm
Njerëzor, duke iu referuar kërcënimit të armëve bërthamore.
Pas gazetave italiane dhe pas deklaratës së Sallës së Shtypit të Vatikanit,
që sqaron se Ati i Shenjtë nuk është ndërmjetësues në çështjen Kore e Veriut – SHBA,
vetë Papa përmendi Takimin e nivelit të lartë, që do të mbahet në Vatikan, më 10 e
11 nëntor. I kushtohet pikërisht çarmatosjes bërthamore. Por, më gjerësisht
për fjalët e Atit të Shenjtë na flet, zv.sekretarja e Dikasterit për Zhvillimin
Njerëzor, Flaminia Giovanelli:
Papa nënvizoi
edhe një herë, siç bën zakonisht, fenomenin e tregtisë së armëve. Denoncoi sërish
tregtinë e armëve, që nxit dhe mban gjallë vatrat e konflikteve. Përsëriti se “Jemi
në një luftë të vërtetë!”. E duke folur për armët bërthamore - kërcënim i pranishëm
prej dhjetra vitesh tashmë, por që bëhet edhe më akut në çastet aktuale - përdori
fjalën “vetëvrasje e njerëzimit”, pra, njerëzimi po shkon drejt rrezikut të vetëvrasjes.
Janë fjalë të fuqishme.
Si lindi ideja e Konferencës së nëntorit në Vatikan?
Lindi me dëshirën
për të vijuar impenjimin e marrë nga Selia e Shenjtë me nënshkrimin e Traktatit për
ndalimin e armëve bërthamore, në shtator të këtij viti. Edhe vetë Papa Françesku deshi
ta nënvizojë këtë firmë, simbolike, por shumë pozitive. Pastaj, jetojmë në periudhën
e ashpërsimit të krizës bërthamore, prandaj Takimi ka rëndësi të dorës së parë. Na
janë përgjigjur shumë personalitete të bashkësisë ndërkombëtare. Vijnë 11 Çmime Nobel
e do të kemi dëshmi edhe nga të mbijetuarit e tragjedisë së Hiroshimës.
