Ֆրանչիսկոս Պապին ցաւակցագիրը Լաս Վեկասի ողբերգական արարքին ի լուր։

(Ռատիօ Վատիկան) Կիրակի 1 հոկտեմբերի երեկոյեան (Իտալիոյ ժամով առաւօտեան 7.10-ին) Լաս Վեկասի մէջ տեղի ունեցող «country»  երաժշտական փառատօնի մը ընթացքին,  64 ամեայ տեղացի Սթեֆըն Փիքոք անունով մարդ մը կրակ բացած է փառատօնին մասնակցող ամբոխին վրայ, սպաննելով եւ վիրաւորելով տասնեակ անձեր։ Ոճրագործը ապա անձնասպան եղած է իր սենեակին մէջ ուր ոստիկանութիւնը  յայտնաբերած է բազմաթիւ զէնքեր։

Ի լուր վերոնշեալ ողբերգական արարքին Վատիկանի Պետական քարտուղար՝ կարդինալ Փիեթրօ Փարոլին, յանուն Ֆրանչիսկոս Պապին հեռագիր մը յղած է Լաս Վեկասի եպիսկոպոս՝ գերապայծառ ԺոզէՖ Անթոնի Փեփէի որուն մէջ արտայայտած է Սրբազան Քահանայապետին կսկիծն ու ցաւը ի տես պատահածին, ապահովեցնելով նաեւ Նորին Սրբութեան հոգեւոր մօտիկութիւնը՝ ոճրագործ արարքի թիրախ անհատներուն, այնպէս ինչպէս Անոր գնահատանքը  ոստիկանութեան ու շտապ օգնութեան անձնակազմի գործունէութեան համար, բոլորին վրայ հայցելով Ամենակալ Աստուծոյ ողորմութիւնը։