Այվազովսկիի «Քաոս. Աշխարհի արարում» հռչակաւոր կտաւը կը ցուցադրուի Հայաստանի մէջ
Հայաստանի Ազգային պատկերասրահը կը պատրաստուի հայազգի աշխարհահռչակ ծովանկարիչ Յովհաննէս Այվազովսկիի ծննդեան 200-ամեակին նուիրուած ցուցահանդէսին, որ պիտի բացուի սեպտեմբեր 15-ին:
Պատկերասրահին մէջ այս օրերուն կ’ընթանան ցուցահանդէսի նախապատրաստական աշխատանքները:
Ազգային պատկերասրահի պաշտօնական կայք-էջի համաձայն, «Յովհաննէս Այվազովսկի. Արարում» ցուցահանդէսին մէջ կը ներկայացուի մեծ նկարիչի ստեղծագործական ուղին` ըստ Հայաստանի ազգային պատկերասրահի գեղանկարչական ու գծագրական հաւաքածուներու եւ տարբեր արխիւներու մէջ պահուող վաւերագիրներու: Հայաստանի մէջ առաջին անգամ կը ցուցադրուի Վենետիկի Մխիթարեան միաբանութեան հաւաքածուի «Քաոս. Աշխարհի արարում» հռչակաւոր կտաւը:
Աւելցնենք, որ 2017 թ. ԵՈՒՆԵՍԿՕ-ի կողմէ յիշարժան տարեթիւերու շարքին մէջ ընդգրուած է Յովհաննէս Այվազովսկիի յոբելեանը (200-ամեակ):
| All the contents on this site are copyrighted ©. |