Մաքսիմ Մանուկեան Երեքշաբթի, Օգոստոս 22-ին հռչակուեցաւ աշխարհի ախոյեան, Փարիզի մէջ իր աւարտին հասնող յունահռոմէական ըմբշամարտի աշխարհի ախոյեանութեան մրցումներուն ընթացքին։ Այս մասին կը հաղորդէ News.am-ը։
80 քլկ. կշիռքի աւարտական մրցումին, Մաքսիմ Մանուկեան ճակատեցաւ այս տարուան Եւրոպայի փոխախոյեան Ռատիք Քուլիեւի դէմ, որ Պելոռուսը կը ներկայացնէ, սակայն ազգութեամբ լեզկի է: Մաքսիմ 5-0 արդիւնքով տպաւորիչ յաղթանակ մը արձանագրեց։
Այս յաղթանակով, Մաքսիմ Մանուկեան իր մարզական ասպարէզին ընթացքին առաջին անգամ ըլլալով դարձաւ աշխարհի ախոյեան:
Յիշեցնենք, որ Մանուկեան կիսաւարտականին տպաւորիչ այլ յաղթանակ մը ապահոված էր վրացի Զուրապի Տաթունաշվիլիի դէմ, 7-0 արդիւնքով, իսկ քառորդ աւարտականին 3-0 արդիւնքով պարտութեան մատնած էր Գերմանիոյ ներկայացուցիչ Փասքան Այզելէն:
30ամեայ Մաքսիմ Մանուկեանի մարզիչն է Ալեքսան Յովհաննիսեան:
All the contents on this site are copyrighted ©. |