Papa, i mallëngjyer për vdekjen e kard. Meisner: e deshi sinqerisht Kishën

Papa mësoi “me mallëngjim të thellë lajmin se papritmas, kardinali Joachim Meisner u thirr nga kjo botë prej Zotit të mëshirës”. Ati i Shenjtë e pohon vetë këtë në telegramin e shkruar e të nënshkruar personalisht për kryeipeshkvin e Këlnit, imzot Rainer Woelki. Kardinali Meisner ndërroi jetë në Gjermani, dje, në moshën 83-vjeçare. Ish-kryeipeshkëv i Këlnit, ishte njëri nga të katër prelatët, autorë të “Dubia”-s, letrës drejtuar Papës Françesku për sqarime mbi Nxitjen Apostolike “Amoris Laetitia”.

“Me fe të madhe e dashuri të sinqertë për Kishën – pohon Ati i Shenjtë në telegram – kardinali Meisner iu përkushtua kumtimit të Lajmit të Mirë të Ungjillit”. “Krishti Zot – shkruan më tej Papa – e shpërbleftë për impenjimin e tij besnik e të patrembur në të mirë të njerëzve të Lindjes e të Perëndimit”. Telegrami përfundon me bekimin apostolik për të gjithë ata, që do ta kujtojnë bariun e ndjerë me lutje e fli.

Jeta e kardinalit Joachim Meisner

         Lindur për Krishtlindje, më 25 dhjetor 1933 në Wroclaw (Polonia e sotme), shugurohet meshtar më 22 dhjetor 1962. Papa Pali VI e emëron ipeshkëv titullar të Vinës, më 17 mars 1975. Shugurohet më 17 majin e atij viti. Më 22 prill 1980, shën Gjon Pali II e vë në krye të dioqezës së Berlinit, e cila përfshinte si Lindjen komuniste, ashtu edhe Perëndimin. Ipeshkvi e zgjodhi banesën në Berlinin Lindor, por lëvizte vazhdimisht edhe përtej murit. U krijua kardinal më 2 shkurt 1983.

        Qe kryetar i Konferencës Ipeshkvnore Gjermane për 7 vjet e më pas, më 20 dhjetor 1988, u bë kryeipeshkëv metropolit i Këlnit deri në vitin 2014, kur doli në pension. Ishte anëtar i Këshillit të Kardinajve për studimin e problemeve organizative dhe ekonomike të Selisë së Shenjtë. Pas vdekjes së tij, Kolegji Kardinalor përbëhet nga 224 anëtarë, 121 prej të cilëve mund të zgjedhin Papën.