Святы Пасад у ААН пра міжнародную салідарнасць

Афіцыйны прадстаўнік Святога Пасаду ў ААН прыняў удзел у пасяджэнні Савета па правах чалавека, прысвечаным міжнароднай салідарнасці. Яно прайшло ў Жэневе 6 чэрвеня 2017 г. Арцыбіскуп Іван Юркавіч падкрэсліў, што міжнароднае супрацоўніцтва з’яўляецца адным з найбольш каштоўных спосабаў для рэалізацыі міжнароднай салідарнасці. 

Ён нагадаў, што свет у цяперашні час сутыкаецца з мноствам праблем: міграцыяй, кліматычнымі зменамі і стыхійнымі бедствамі, узброенымі канфліктамі і ростам прорвы паміж беднымі і багатымі. Іх можна вырашыць толькі праз міжнародную салідарнасць. Прычым яна не з’яўляецца проста сацыяльнай працай; гэта палітычнае, эканамічнае і навуковае стаўленне, а таксама ўзаемадзеянне паміж асобнымі людзьмі, народамі і краінамі. 

На думку прадстаўніка Святога Пасаду, у сённяшніх людзях неабходна культываваць большае разуменне таго, што яны з’яўляюцца даўжнікамі грамадства – карыстальнікамі ўсяго, што асягнула чалавецтва: культуры, навуковых і тэхнічных ведаў, матэрыяльных і нематэрыяльных тавараў. 

Салідарнасць не толькі не супярэчыць суверэнітэту, але і падштурхоўвае да больш глыбокага разумення яго канцэпцыі як выразу волі людзей. Міжнародная салідарнасць прадугледжвае ўдзел людзей у працэсах прыняцця рашэнняў і, у прыватнасці, прызнанне прынцыпу субсідыярнасці.

Існуе неабходнасць ліквідацыі карэнных прычын асіметрыі і няроўнасці паміж краінамі і ўнутры дзяржаў і структурных перашкод і фактараў, якія спараджаюць і замацоўваюць беднасць і няроўнасць ва ўсім свеце, агучыў пазіцыю Святога Пасаду арцыбіскуп Юркавіч. 

Толькі такі падыход можа садзейнічаць забеспячэнню міру, бяспекі і гарантаваць і пакласці канец любога роду дыскрымінацыі і сацыяльнай несправядлівасці, сказаў ён і ў завяршчэнне працытаваў папу Францішка, які лічыць, што cалідарнасць з’яўляецца найбольш эфектыўным проціяддзем ад сучасных форм папулізму.