ഫ്രാന്‍സീസ് പാപ്പാ ഇറ്റലിയിലെ ജേനൊവയില്‍
ഫ്രാന്‍സീസ് പാപ്പാ ഇറ്റലിയിലെ ജേനൊവ അതിരൂപതയില്‍ ഇടയസന്ദര്‍ശനം നടത്തി.
വത്തിക്കാനില്‍ നിന്ന് 500 കിലോമീറ്ററിലേറെ അകലെ ഇറ്റലിയുടെ വടക്കുപടിഞ്ഞാറ് സ്ഥിതിചെയ്യുന്ന തുറമുഖപട്ടണമായ ജേനൊവയില്‍ പാപ്പാ എത്തിയത് ശനിയാഴ്ച(27/05/17) ആണ്.
ഫ്രാന്‍സീസ് പാപ്പാ ഇറ്റലിക്കുള്ളില്‍, റോം രൂപതയ്ക്ക് വെളിയില്‍ നടത്തിയ പതിനഞ്ചാമത്തെ ഇടയസന്ദര്‍ശനമായിരുന്നു ഇത്.
വത്തിക്കാനില്‍ നിന്ന് പ്രാദേശിക സമയം രാവിലെ 7 മണിക്ക്, ഇന്ത്യയിലെ സമയം രാവിലെ 10.30 ന് റോമിലെ ചെറിയ വിമാനത്താവളമായ ചമ്പീനൊയിലേക്ക് കാറില്‍ പുറപ്പെട്ട പാപ്പാ അവിടെ നിന്ന് വിമാനത്തിലാണ് ജേനൊവയില്‍ എത്തിയത്.
തൊഴില്‍ ലോകവുമായുള്ള കൂടിക്കാഴ്ച ആയിരുന്നു പാപ്പായുടെ ഈ സന്ദര്‍ശനത്തിലെ പ്രഥമ പരിപാടി. തുടര്‍ന്ന് പാപ്പാ ജേനൊവ അതിരൂപതയും ഉള്‍ക്കൊള്ളുന്ന ലിഗൂറിയ പ്രദേശത്തെ കത്തോലിക്കാമെത്രാന്മാരും, വൈദികരും, സെമിനാരിവിദ്യാര്‍ത്ഥികളും സമര്‍പ്പിതരും, അരമനയിലെ അല്മായസഹകാരികളും വിവിധമതപ്രതിനിധികളുമായും കൂടിക്കാഴ്ച നടത്തി. വിശുദ്ധ ലോറന്‍സിന്‍റെ നാമത്തിലുള്ള കത്തീദ്രലില്‍ നടന്ന ഈ കൂടിക്കാഴ്ചകള്‍ക്കുശേഷം പാപ്പാ കാവലാളായ പരിശുദ്ധ കന്യകാമറിയത്തിന്‍റെ ദേവാലയത്തില്‍ വച്ച് യുവജനങ്ങളുമായി സംഭാഷണത്തിലേര്‍പ്പെട്ടു. ജേനൊവയിലെ കാരഗൃഹവുമായി വീഢിയോ ബന്ധം ഒരുക്കിയിരുന്നതിനാല്‍ തടവുകാര്‍ക്ക് വീഡിയോ സംവിധാനത്തിലൂടെ ഈ കൂടിക്കാഴ്ചയില്‍ പങ്കുചേരാന്‍ കഴിഞ്ഞു.
ഈ ദേവാലയവളപ്പിലെ ഒരു ശാലയില്‍വച്ച് പാപ്പാ പാവപ്പെട്ടവരും അഭയാര്‍ത്ഥികളും പാര്‍പ്പിടരഹിതരും തടവുകാരുമടങ്ങുന്ന ഏതാനും പേരുമൊത്തു ഉച്ചഭക്ഷണം കഴിച്ചു.
ഉച്ചതിരിഞ്ഞ് പാപ്പാ, ജേനൊവയില്‍ കുട്ടികള്‍ക്കായുള്ള ആശുപത്രിയായ “ജന്നീന ഗസ്ലീനി” സന്ദര്‍ശിച്ചു. തദ്ദനന്തരം പാപ്പാ കെന്നഡി ചത്വരത്തില്‍ വിശുദ്ധകുര്‍ബ്ബാന അര്‍പ്പിക്കുകയും വത്തിക്കാനിലേക്കു മടങ്ങുകയും ചെയ്തു.
| All the contents on this site are copyrighted ©. |